नागरिकांना सुलभपणे घराजवळ लसीकरण करता याने यादृष्टीने लसीकरण केंद्र संख्येतही आवश्यकतेनुसार भर घालण्यात आली आहे. अगदी लसींची कमतरता होती त्या कालावधीतही लसीकरणाचे दैनंदिन नियोजन करून पहिल्या व दुस-या डोसचा योग्य ताळमेळ राखण्यात आला. लस कमी प्रमाणात उपलब्ध होती अशा सुरूवातीच्या काळात ४५ वर्षावरील नागरिकांच्या लसीकरणाला प्राधान्य देण्यात आले.
नवी मुंबई : लसींच्या उपलब्धतेनुसार लसीकरणाचे योग्य नियोजन केल्यामुळेच १८ वर्षांवरील नागरिकांना लसीचा पहिला डोस देण्याचे १०० टक्के उद्दिष्ट साध्य करणारे नवी मुंबई हे एमएमआर क्षेत्रातील पहिले शहर ठरले आहे. आत्तापर्यंत १८ वर्षांवरील ११ लाख ७ हजार २३३ नागरिकांना कोव्हीड लसीचा पहिला डोस देण्यात आलेला आहे. म्हणजेच १००.०२ टक्के लसीकरण झालेले आहे.
त्याचप्रमाणे विहित कालावधीत दुसरा डोस दिला जावा याकडेही कटाक्षाने लक्ष दिल्यामुळे दोन्ही डोस घेणा-या नागरिकांची संख्याही ५ लाख ७६ हजार ५६७ म्हणजेच लक्ष्यांकाच्या ५२.०८ टक्के इतकी लक्षणीय आहे. शासनाने दिलेल्या १८ वर्षांवरील लोकसंख्येच्या आधारावर पालिकेने १०० टक्के लक्ष्य गाठले आहे. मात्र सध्या अस्तित्वात असलेल्या लोकसंख्येनुसार पहिल्या डोससाठीचे लसीकरण सुरूच राहणार आहे.
नागरिकांना सुलभपणे घराजवळ लसीकरण करता याने यादृष्टीने लसीकरण केंद्र संख्येतही आवश्यकतेनुसार भर घालण्यात आली आहे. अगदी लसींची कमतरता होती त्या कालावधीतही लसीकरणाचे दैनंदिन नियोजन करून पहिल्या व दुस-या डोसचा योग्य ताळमेळ राखण्यात आला. लस कमी प्रमाणात उपलब्ध होती अशा सुरूवातीच्या काळात ४५ वर्षावरील नागरिकांच्या लसीकरणाला प्राधान्य देण्यात आले. तसेच ज्यांनी लसीचा पहिला डोस घेतलेला आहे. त्यांना विहित कालावधीत दुसरा डोस उपलब्ध करून देण्याची काळजी घेण्यात आली.
अगदी सार्वजनिक सुट्टीच्या दिवशीही रूग्णालयांतील लसीकरण केंद्रे सुरू ठेवून लसीकरणात एकही दिवस खंड पडू दिला नाही. या सर्वांचा परिपाक म्हणजे नवी मुंबई हे १८ वर्षांवरील १०० टक्के नागरिकांचा पहिला डोस पूर्ण करणारे एम.एम.आर. क्षेत्रातील पहिले शहर ठरले आहे.
| लसीकरण लाभार्थी | पहिला डोस | दुसरा डोस |
| डॉक्टर्स व इतर आरोग्यकर्मी | ३४,४४५ | २२,९७० |
| पोलीस, सुरक्षा. स्वच्छता व इतर पहिल्या फळीतील कोरोना योध्दे | ३०,८३० | २१,९४७ |
| ६० वर्षावरील नागरिक (६०+) | ९३,२१७ | ८१,६८० |
| ४५ ते ६० वयोगटातील नागरिक | २२६८५६ | १,६५,४५४ |
| १८ ते ४५ वयोगटातील नागरिक | ७२१८८५ | २८४५१६ |
| एकूण | ११,०७,२३३ | ५,७६,५६७ |
अशाप्रकारे कोव्हीड लसीचे एकूण १६ लाख ८३ हजार ८०० डोस नागरिकांना देण्यात आलेले आहेत.
लसीकरण केंद्र संख्येत ११० पर्यंत वाढ करीत १०१ लसीकरण केंद्रे कार्यान्वित करण्यात आली. त्यामध्ये ईएसआयएस रूग्णालय सेक्टर ५ वाशी व विष्णुदास भावे नाट्यगृह वाशी येथील लसीकरण केंद्रांमध्ये दोनपेक्षा अधिक बूथ कार्यान्वित करून जम्बो लसीकरण केंद्रे सुरू करण्यात आली. इनॉर्बिट मॉल वाशी व ग्रॅंड सेंट्रल मॉल सीवूड नेरूळ येथे ड्राईव्ह इन लसीकरणाची सुविधा नागरिकांना उपलब्ध करून देण्यात आली. त्याचप्रमाणे महापालिका रूग्णालयांतील लसीकरण केंद्रे नागरिकांच्या सोयीसाठी २४ तास कार्यान्वित करण्यात आली.
यांचे लसीकरण
मेडिकल स्टोअर, हॉटेल, सलून, ब्युटी पार्लर, पेट्रोल पम्प, टोल नाका तसेच घरोघरी गॅस वितरण करणारे कर्मचारी, घरकाम करणारे महिला व पुरूष कामगार, ऑटो / टॅक्सी वाहनचालक, सोसायटी वॉचमन अशा कोरोनाच्या दृष्टीने जोखमीच्या व्यक्ती त्याचप्रमाणे दिव्यांग व्यक्ती यांचेकरिता विशेष लसीकरण सत्राचे आयोजन करण्यात आले. तसेच बेघर, निराधार व्यक्ती यांच्या लसीकरणाकरिता विशेष संगणकीय प्रणाली तयार करून लसीकरण करण्यात आले. त्याचप्रमाणे तृतीयपंथीय तसेच कॉरी क्षेत्र आणि रेडलाईट भागातही विशेष लसीकरण मोहीम राबविण्यात आली.
अंथरूणाला खिळलेल्या बेडरिडन व्यक्तींसाठी वृध्दाश्रमात जाऊन तसेच घरी जाऊन लसीकरण करण्यात येत असून शासनाने जाहीर केलेल्या ‘मिशन कवच कुंडल’ मोहिमेअंतर्गत १२ रूग्णवाहिकांव्दारे १९२ स्पॉट्सवर जाऊन ‘लसीकरण आपल्या दारी’ उपक्रमामध्ये मोठ्या प्रमाणात नागरिकांचे लसीकरण करण्यात आले.
कोव्हीड लसीकरणातील पहिल्या डोसचे १०० टक्के लक्ष्य गाठणारे शहर ही सर्व नवी मुंबईकर नागरिकांसाठी समाधानाची आणि अभिमानाची बाब आहे. नवी मुंबईकर नागरिकांच्या सहकार्यामुळेच हे शक्य झालेले आहे. शहरातील सद्यस्थितीत असलेली लोकसंख्या किंवा इथे तात्पुरत्या स्वरूपात येणाऱ्या व राहणाऱ्या व्यक्ती विचारात घेता पहिला डोसचे लसीकरणही सुरू असणार आहे. तिसऱ्या लाटेचा धोका लक्षात घेता नागरिकांनी नियमांचे पालन करावे.
अभिजित बांगर आयुक्त, नवी मुंबई पालिका
