सेल्फी काढण्याच्या नादात सुरक्षेकडे दुर्लक्ष केल्याने महाबळेश्वर येथे एका नवविवाहीत महिलेचा हाकनाक मृत्यू झाला आहे. अंकिता गुरव असे महिलेचे नाव असून, आपल्या पतीसोबत त्या पर्यटनासाठी आल्या होत्या.
महाबळेश्वर : महाबळेश्वर पासून 8 किमीवर असलेल्या केट्स पॅाईंट परिसरातील नीडल होल पॉईंट येथील धबधब्याचा फोटो व व्हिडीओ काढताना तोल जाऊन पुणे येथिल अंकिता सुनिल शिरस्कर (गुरव) वय 23 सध्या रा. धनकवडी, ही नवविवाहीता तिनशे फूट खोल दरीमध्ये कोसळून ठार झाली. ही घटना मंगळवारी दुपारी साडेचारच्या सुमारास घडली.
रेल्वेमध्ये लोको पायलट (चालक) असलेले सुनील ज्ञानदेव शिरस्कर, (वय 30, रा. उंबरेगव्हाण, ता. जि. धाराशिव, सध्या रा. धनकवडी, पुणे) पर्यटक दांपत्य सोमवारी (दि 09) दोन दिवसांसाठी दुचाकीवरून महाबळेश्वर पर्यटनास आले होते. सोमवारी दांपत्य विविध प्रेक्षणिय स्थळांसह केट्स पाॅईंट पाहून गेले होते. सकाळी त्यांनी येथिल काही प्रेक्षणीय स्थळांना भेट दिली. दुपारी जेवन करुन पुणे येथे जाण्यासाठी परतीचा प्रवास सुरु केला. महाबळेश्वरपासून सहा किमी आले असता पतीकडे पत्नीने पुन्हा केट्स पॅाईंट पाहण्याची इच्छा व्यक्त केली.
दुपारी साडेचार वाजता केट्स पाँईट येथे दांपत्य पोहचले. केट्स पॅाइंट पाहून ते निडल होल व परिसरातील धबधबा पाहण्यासाठी पाईंटवरील सुरक्षा कठड्यावर बसून त्यांनी फोटो व व्हिडीओ काढले. असाच एक धबधब्याचा फोटो व व्हिडीओ घेताना अंकीता कठड्यावरुन थेट तिनशे फूट खोल दरीमध्ये कोसळल्या. या अपघातात त्या जागीच ठार झाल्या.
घटनेची माहिती स्थानिकांनी महाबळेश्वर व पाचगणी पोलीस ठाण्यासह वनविभाग महाबळेश्वर ट्रेकर्स व सह्याद्री ट्रेकर्स यांना दिली. अपघाताची माहिती मिळताच पोलीस, वनविभागाचे अधिकारी व जवानांनी अपघात स्थळी धाव घेतली. यामध्ये पाचगणी पोलिस ठाण्याचे राजेश माने, महाबळेश्वरचे पोलीस उपनिरीक्षक रौफ इनामदार, पोलीस उपनिरीक्षक स्नेहल सोमदे महाबळेश्वर ट्रेर्कसचे सुनिल बाबा भाटिया व सह्याद्री ट्रेर्कसचे संजय पार्टे यांच्यासह टिमने 5: 30 वाजता मदतकार्यास सुरुवात केली. ट्रेकर्सच्या जवानांनी तिन पथके तयार केली एक पथक मुख्य ठिकाणी दुसरे पथक रोपच्या सहाय्याने घटनास्थळावर पोहचले तर तिसरे पथक केट्स पॅाईंट वरुन डोंगर उतरुन घटनास्थळी पोहचले.
अडीच तासांच्या प्रयत्नानंतर मृतदेह बाहेर
ट्रेकर्स पथकांमध्ये महाबळेश्वर ट्रेकर्सचे सुनील भाटिया, जयवंत बिरामणे, अनिल लांगी, सुनिल केळगणे, महेश साळेकर आदींसह सह्याद्री ट्रेकर्सचे संजय पार्टे, विजय केळगणे, वनविभागाचे वनरक्षक सहदेव भिसे, वननरक्षक लहू राऊत तानाजी केळगणे, वनस्थापन समितीचे सदस्य आदींनी महत्वाची भूमीका बजावली. अडीच तासांच्या अथक प्रयत्नानंतर मृतदेह दरीतून वर काढण्यात यश आले.
सुखी संसाराचे स्वप्न अधूरेच राहिले
सुनिल सोबत सुखी संसाराचे स्वप्न पाहत साधारण अवघ्या दहा महिन्यांपूर्वी बोहल्यावर चढलेल्या अंकिताचे स्वप्न तिच्या अकाली जाण्याने अधूरेच राहिले. सुनिलला नोकरीतून सुट्टी मिळणे दुरापास्त झाले होते. त्यातच डिसेंबर 2023 मध्ये तो पुढील प्रशिक्षणासाठी भूसावळ येथे जाणार होता. त्यापुर्वी महाबळेश्वर येथे पर्यटनास जाण्याचा बेत त्यांनी आखला. आणि हे पर्यटन तिच्यासाठी अखेरचे ठरले. यावेळी सुनिलने फोडलेला हंबरडा पाहून उपस्थीतांच्या डोळ्याच्या कडा पाणावल्या.
Loading ...