कुलू जिल्ह्यातील दोभी परिसरात पॅराग्लायडींग करताना एकाचा दुर्देवी मृत्यू (Death In paragliding Accident) झाला आहे.
महाराष्ट्रामधील एका पर्यटकाच्या (Tourist) बाबतीत एक भयानक घटना घडली आहे. कुलू जिल्ह्यातील दोभी परिसरात पॅराग्लायडींग करताना एकाचा दुर्देवी मृत्यू (Death In paragliding Accident) झाला आहे. अपघाताच्या वेळी उपस्थित असलेल्यांनी दिलेल्या माहितीनुसार हा पर्यटक शेकडो फूट उंचीवरुन खाली पडला. पॅराग्लायडींग करताना हार्नेसमध्ये (दोरी) गडबड झाली असल्याने हा अपघात झाल्याची शक्यता वर्तवण्यात आली आहे. या पर्यटकाचा जागीच मृत्यू झाला मात्र त्याच्याबरोबर असलेला पॅराग्लायडर सुरक्षित आहे.
सुरज शाह असं मृत्यू झालेल्या ३० वर्षीय व्यक्तीचं नाव आहे. सुरज हा साताऱ्यातील शिवरळ गावातील रहिवाशी होता. तो त्याच्या मित्रांबरोबर मनालीला गेला होता. या प्रकरणामध्ये कूल्लूचे पोलीस अधिक्षक गुरुदेव शर्मा यांनी रविवारी या अपघातासंदर्भात पोलीस स्थानकात माहिती मिळाल्याचं सांगितलं.
पोलीस अधिक्षक म्हणाले की, एक व्यक्ती पॅराग्लायडींग करताना पडली असून फार उंचावरुन ही व्यक्ती जमिनीवर पडल्याची माहिती मिळाली.पॅराग्लायडर सुरक्षित असून पर्यटकाचा मात्र जागीच मृत्यू झाला. कलम ३३६ अंतर्गत (दुसऱ्यांचा जीव धोक्यात टाकणे) बेजबाबदारपणे वागल्याचा ठपका ठेवत गुन्हा दाखल करण्यात आला आहे. तसेच ३०४ अ (बेजबादारपणामुळे दुसऱ्यांच्या मृत्यूला कारणीभूत ठरणं) अंतर्गतही गुन्हा दाखल करण्यात आहे.
याआधीही पॅराग्लायडिंग करताना अशा मृत्यूच्या घटना घडल्या आहेत. जानेवारी महिन्यामध्ये हिमाचल प्रदेश उच्च न्यायालयाने राज्यातील साहसी खेळांवर बंदी घातली आहे. बंगळुरुमधील १२ वर्षीय मुलाचा बीर बिलिंग येथे पॅराग्लायडिंग साईटवर मृत्यू झाल्याप्रकरणी न्यायालयाने हे निर्देश दिले होते.
न्यायालयाने साहसी खेळांसंदर्भात तांत्रिक समिती नियुक्तीबाबत निर्देश दिले होते. यानंतरच्या तपासामध्ये साहसी खेळांचं नियोजन करणाऱ्या अनेकांकडे सदोष साहित्य असल्याच समितीच्या निदर्शनास आलं. एप्रिल महिन्यामध्ये किमान सुरक्षा निश्चित करणारं साहित्य असलेल्यांनाच पुन्हा साहसी खेळांना परवानगी देण्यात आली होती.
