मनपा आयुक्तांच्या कक्षात इसमाचा स्वतःवर चाकूहल्ला

आयुक्त राजेश मोहिते दुपारी कक्षात बसले असताना त्यांच्या ओळखीचा असलेला लक्ष्मण पवार नामक इसम कक्षात गेला. कक्षात लक्ष्मण पवार आणि आयुक्त दोघेच असताना या व्यक्तीने स्वतः वर चाकूने 3 वार करत स्वतःला जखमी केले.

    चंद्रपूर : चंद्रपूर मनपा आयुक्तांच्या कक्षात (Municipal commissioner )एका इसमाने स्वतःवर चाकूहल्ला केल्याने घटना उघडकीस आली आहे. या घटनेमुळे मनपा वर्तुळात एकच खळबळ उडाली आहे. ज्यावेळी ही घटना घडली तेव्हा तो इसम आयुक्तांच्या कक्षात असल्याची माहिती समोर आली आहे.

    आयुक्त राजेश मोहिते दुपारी कक्षात बसले असताना त्यांच्या ओळखीचा असलेला लक्ष्मण पवार नामक इसम कक्षात गेला. कक्षात लक्ष्मण पवार आणि आयुक्त दोघेच असताना या व्यक्तीने स्वतः वर चाकूने 3 वार करत स्वतःला जखमी केले. भेदरलेल्या आयुक्तांनी चपराशी आणि सुरक्षारक्षकांना जोराने आवाज दिला. यावेळी आतील दृश्य पाहून सर्व जण घाबरुन गेले. याबाबत तातडीने चंद्रपूर शहर पोलीस ठाण्याला कळवण्यात आलं. पोलिसांनी घटनास्थळी येत जखमीला ताब्यात घेतलं. लक्ष्मण पवार लातूर जिल्ह्यातील उदगीरच्या टाकळी येथील रहिवासी असल्याची माहिती पुढे आली आहे. जुन्या आर्थिक वादातून ही घटना झाल्याची माहिती सूत्रांनी दिली आहे. पोलिसांनी जखमीला जिल्हा सामान्य रुग्णालयात दाखल केले असून सिटी पोलीस घटनेचा अधिक तपास करीत आहे.