आमच्या नादी लागू नका, नाहीतर…; छत्रपती संभाजीनगरमधल्या राड्यानंतर मनसेचा थेट इशारा

संभाजीनगरमध्ये ठाकरे गट व शिंदे गट हे आमने सामने आले. या प्रकरणानंतर मनसेकडून महाविकास आघाडीला इशारा देण्यात आलेला आहे. मनसेचे नेते संदीप देशपांडे यांनी या प्रकारावरुन इशारा दिला आहे.

    संभाजीनगर : लोकसभा निवडणूकीच्या चौथ्या टप्प्यातील मतदान दोन दिवसांनंतर पार पडणार आहे. आज चौथ्या टप्प्यातील प्रचार थांबणार आहे. त्यापूर्वी संभाजीनगरमध्ये ठाकरे गट व शिंदे गट हे आमने सामने आले. एकमेकांसमोर जोरदार घोषणाबाजी करण्यात आली. त्यामुळे काही काळ तणावपूर्ण वातावरण निर्माण झाले होते. या प्रकरणानंतर मनसेकडून महाविकास आघाडीला इशारा देण्यात आलेला आहे. मनसेचे नेते संदीप देशपांडे यांनी या प्रकारावरुन इशारा दिला आहे.

    चंद्रकांत खैरे हे आऊटडेटेड नेते

    मनसेने महायुतीला बिनशर्त पाठिंबा दर्शवला असून प्रचारामध्ये देखील मनसे सक्रीय सहभाग घेत आहे. संभाजीनगरमध्ये झालेल्या प्रकारानंतर मनसे नेते संदीप देशपांडे यांनी प्रतिक्रिया देत इशारा दिला आहे. देशपांडे म्हणाले, आमच्या मनसैनिकांच्या नादाला कोणी लागू नये. नाही तर यांच्या पार्श्वभागाला पाय लावून पळायला लावू. यांनी हात तोडण्याची भाषा करू नये यांना तर आम्ही पळून पळून मारलं आहे. चंद्रकांत खैरे हे आऊटडेटेड नेते आहेत. सिम कार्ड नसलेला जुना मोबाईल आहे ही काय आम्हाला धमकी देणार? अशा शब्दांत संदीप देशपांडे यांनी सुनावले आहे.

    त्यांना बाळासाहेब ठाकरे चपलीने मारल्याशिवाय राहणार नाहीत

    संजय राऊत यांनी राज ठाकरे यांच्यावर देखील प्रतिक्रिया दिली होती. त्यावरुन देखील संदीप देशपांडे यांनी ठाकरे गटाचे खासदार संजय राऊत यांच्यावर निशाणा साधला. संदीप देशपांडे म्हणाले, संजय राऊत यांनी भाजपचा प्रचार केला तेव्हा ते देशप्रेमी आणि आम्ही प्रचार केला की देशद्रोही…ज्या राहुल गांधींनी स्वातंत्र्यवीर सावरकर यांच्याबद्दल घाणेरडी वक्तव्यं केली. त्यांच्या मांडीला मांडी लावून तुम्ही बसले आहात. संजय राऊत जेव्हा वर जातील, तेव्हा त्यांना बाळासाहेब ठाकरे चपलीने मारल्याशिवाय राहणार नाहीत. हे माझं वाक्य लिहून घ्या. काँग्रेससारख्या देशद्रोह्यांसोबत जाऊन बसले आहे. त्यामुळे बाळासाहेब ठाकरेंच्या आत्म्याला त्रास होत आहे. बाळासाहेबांना जो त्रास होत आहे तो आमचा नाही यांचा होत आहे. मनसेची दखल घ्यावीशी वाटत नाही तर थोबाड कशाला उघडता मनसेच्या सभा पाहून हे घाबरले आहेत, अशा शब्दांत संदीप देशपांडे यांनी आक्रमक प्रतिक्रिया दिली आहे.