गणेशोत्सवात भाविकांकडील मोबाइल चोरणाऱ्या झारखंडमधील चोरट्यांच्या टोळीला हडपसर पोलिसांनी पकडले. या टोळीकडून तब्बल १६ लाख रुपयांचे ५२ मोबाइल संच जप्त करण्यात आले आहेत.
पुणे : गणेशोत्सवात भाविकांकडील मोबाइल चोरणाऱ्या झारखंडमधील चोरट्यांच्या टोळीला हडपसर पोलिसांनी पकडले. या टोळीकडून तब्बल १६ लाख रुपयांचे ५२ मोबाइल संच जप्त करण्यात आले आहेत. टोळी खास गणेशोत्सवाच्या कालावधीत मोबाईल चोरीसाठी आल्याचेही समोर आले आहे. दोन साथीदार पसार असून, पोलीस त्यांचा शोध घेत आहेत.
शामकुमार संजय राम (वय २५), विशालकुमार गंगा महातो (वय २१), बालदत्तकुमार मोतीलाल महातो (वय २५), विकीकुमार गंगा महातो उर्फ बादशाह नोनीया (वय १९, चौघे रा. साहेबगंज, झारखंड) अशी अटक करण्यात आलेल्या मोबाइल चोरट्यांची नावे आहेत. त्यांचे साथीदार गोपी महातो, राहुल महातो पसार झाले असून, त्यांचा शोध घेण्यात येत आहे.
ही कारवाई परिमंडळ पाचचे उपायुक्त विक्रांत देशमुख यांच्या मार्गदर्शनाखाली वरिष्ठ पोलीस निरीक्षक रवींद्र शेळके, पोलीस निरीक्षक विश्वास डगळे, संदीप शिवले, सहायक निरीक्षक विजयकुमार शिंदे, उपनिरीक्षक अविनाश शिंदे, सुशील लोणकर, संदीप राठोड, समीर पांडुळे, सचिन जाधव, प्रशांत दुधाळ आदींनी केली.
गणेशोत्सवात भाविकांकडील मोबाइल चोरीचे प्रमाण मोठे असते. दरवर्षी हजारो मोबाईल चोरीला जातात. परंतु, पोलीस मात्र, मिसींग दाखल करण्याचे नागरिकांना सांगतात. वेगवेगळ्या राज्यातील टोळ्या या कालावधीत अॅक्टीव्ह असतात. गर्दीचा फायदा घेत चोरटे नागरिकांचे मोबाईल चोरत असतात. यापार्श्वभूमीवर गुन्हे शाखा व स्थानिक पोलिसांना सूचना देण्यात आलेल्या आहेत.
यादरम्यान, झारखंडमधील चोरटे आले असून, ते हडपसर भागात थांबल्याची माहिती पोलीस कर्मचारी अजित मदने, कुंडलिक केसकर यांना मिळाली. पोलिसांनी उन्नतीनगर परिसरात सापळा लावून टोळीला पकडले. पण, त्यातील दोघे पसार होण्यात यशस्वी झाले. चौघांकडे चौकशी केल्यानंतर त्यांनी गणेशोत्सवात भाविकांकडील मोबाइल चोरण्यासाठी पुण्यात आल्याची कबुली दिली आहे.
चोरट्यांकडून ५२ मोबाइल जप्त करण्यात आले आहेत. मध्यभागातील महात्मा फुले मंडई, येरवडा भाजी मंडई व इतर भागातून हे मोबाइल चोरल्याचे तपासात निष्पन्न झाले. हडपसर, येरवडा, विश्रामबाग, फरासखाना, बंडगार्डन, स्वारगेट पोलीस ठाण्यांच्या हद्दीत मोबाइल चोरीचे गुन्हे चोरट्यांनी केले आहेत.
Loading ...