जप्त केलेल्या वॉलेटची खोटी माहिती देऊन तपासाची दिशाभूल केली. तसेच वॉलेटमधील पुर्ण बिटकॉईन जप्त न करता त्यात काही बिट कॉईन ठेवून शासनाची फसवणूक केली असल्याचे पोलीसांनी म्हटले आहे. त्यांनी स्वत:च्या नावावर बिट कॉईन वळवून घेतले असल्याचे त्यांच्या के.वाय.सीवरून स्पष्ट झाल्यानंतर पोलीसांनी गुन्हा दाखल करत या दोघांना अटक केली.
पुणे : देशभरात गाजलेल्या क्रिप्टो करंन्सी या आभासी चलनाच्या प्रकरणात पुणे पोलीसांनी तत्कालीन सायबर एक्सपर्ट म्हणून काम केलेल्या दोन सायबर तज्ञांना मध्यरात्री मोठा फौजफाट्यात राहत्या घरातून अटक केली. पोलीसांच्या अज्ञानाचा गैरफायदा घेऊन आभासी चलन स्वत: घेतल्याचे प्राथमिक चौकशीत समोर आले आहे. दरम्यान दोन्ही तज्ञ तत्कालीन पोलीस अधिकाऱ्यांच्या मर्जीतील असल्याचे बोलले जात होते. या कारवाईने राज्यभरात खळबळ उडाली आहे.
पंकज प्रकाश घोडे (रा. ताडीवाला रोड) तसेच रविंद्र प्रभाकर पाटील (रा. बिबवेवाडी) अशी अटक केलेल्या दोघांची नावे आहेत. याप्रकरणी सायबर पोलीस ठाण्यात फसवणूकीसह इतर कलमानव्ये गुन्हा दाखल केला आहे. दोघांना न्यायालयात हजर केले असता त्यांना सात दिवसांची पोलीस कोठडी सुनावली आहे.
पोलीसांनी दिलेल्या माहितीनुसार, पुण्यात क्रिप्टो करन्सी या आभासी चलनात (बिटकॉईन) गुंतवणूक करण्याच्या अमिषाने लाखो रुपयांची फसवणूक केल्याचा प्रकार २०१८ मध्ये उघड झाला होता. याप्रकरणी दत्तवाडी व निगडी पोलीस ठाण्यात दोन गुन्हे दाखल होते. गुन्हा हा तांत्रिक असल्याने पोलीस अधिकाऱ्यांना मदत करण्यासाठी व आरोपींकडून संबंधित मालमत्ता जप्त करण्यासाठी सायबर तज्ञांची गरज होती. त्यात ग्लोबल ब्लॉकचेन फाऊंडेशनतर्फे पंकज घोडे व के.पी.एम.जी. तर्फे रविंद्र पाटील यांना नेमण्यात आले होते.
दरम्यान, या गुन्ह्या्चा तपास सुरू तसेच मालमत्ता जप्त करताना दोघांची भूमिका संशयास्पद होती.
प्रकरणी मुंबई आर्थिक गुन्हे शाखेच्या अप्पर पोलीस महासंचालकांकडून चौकशी करण्याचे आदेश पुणे पोलीसांच्या आर्थिक व सायबर पोलीसांना देण्यात आले होते. त्यानुसार या गुन्ह्याचा तपास पुन्हा सुरू केला होता. त्यात पुणे पोलीसांना संशयास्पद गोष्टी आढळून आल्या आहेत. तत्पुर्वी या गुन्ह्यात पुणे पोलीसांनी १७ जणांना अटक केली होती. त्यांच्याकडून काही बिटकॉईन व क्रिप्टो करन्सी जप्त केली होती. तत्कालीन अधिकाऱ्यांनी जप्त केलेला डाटा हा विश्वासाने या दोघांकडे दिला होता. परंतु, त्यांनी तपासी पोलीसांच्या अज्ञानाचा तसेच त्यांच्यावर अवलंबून असल्याचा गैरफायदा घेतला व रविंद्रनाथ पाटील याने या डाटामधून आर्थिक फायद्यासाठी त्यातील वॉलेटमधून बिट कॉईन काढून स्वत:च्या तसेच इतर साथीदारांच्या वॉलेटवर घेतले. तर, पंकज घोडे याने अधिकाऱ्यांची दिशाभूल करण्यासाठी जप्ती पंचनामे करताना आरोपींच्या वॉलेटमधील ब्लॉकचेनचे स्क्रीनशॉट बनावटीकरण केले. या बनावट स्क्रीनशॉटच्या खरे असल्याचे भासवून तपासासाठी सादर केल्याचे समोर आले आहे.
त्यासोबतच जप्त केलेल्या वॉलेटची खोटी माहिती देऊन तपासाची दिशाभूल केली. तसेच वॉलेटमधील पुर्ण बिटकॉईन जप्त न करता त्यात काही बिट कॉईन ठेवून शासनाची फसवणूक केली असल्याचे पोलीसांनी म्हटले आहे. त्यांनी स्वत:च्या नावावर बिट कॉईन वळवून घेतले असल्याचे त्यांच्या के.वाय.सीवरून स्पष्ट झाल्यानंतर पोलीसांनी गुन्हा दाखल करत या दोघांना अटक केली. ही कारवाई पोलीस आयुक्त अमिताभ गुप्ता, पोलीस सह आयुक्त डॉ. रविंद्र शिसवे, पोलीस उपायुक्त भाग्यश्री नवटके यांच्या मार्गदर्शनाखाली पोलीस निरीक्षक चिंतामण व त्यांच्या पथकाने केली आहे.
घर व ऑफिसची झडती…
पुणे पोलीसांनी मोठ्या फौजफाट्यात दोघांना त्यांच्या राहत्या घरातून अटक केली आहे. मध्यरात्री त्यांना पकडल्यानंतर लागलीच घर तसेच ऑफिसची झडती देखील घेण्यात आली आहे. तेथून नेमके पोलीसांच्या हाती काय लागले हे समजू शकलेले नाही. या दोघांना आज न्यायालयात हजर केले असता त्यांना ७ दिवसांची पोलीस कोठडी सुनावली आहे.
Loading ...