बनावट नोटांच्या कारखान्यावर पोलिसांचा छापा; एकाला अटक

    जळगाव : जिल्ह्यातील जामनेर तालुक्यातील हिंगणा येथील एक तरूण बनावट नोटांची छपाई करत असल्याचा धक्कादायक प्रकार घडला असून या प्रकरणी एकाला अटक करण्यात आली आहे. या घटनेमुळे शहरात एकच खळबळ उडाली आहे.

    जामनेर तालुक्यातील हिंगणे येथील रहिवासी असणारा उमेश चुडामण राजपूत (वय २२) हा काल रात्रीच्या सुमारास पहूर बस स्थानक परिसरात संशयास्पद पध्दतीत फिरत होता. यामुळे पोलिसांनी त्यांची विचारपूस करून झडती घेतली. यात त्याच्याकडे दोनशे रूपयाची एक बनावट नोट आढळून आली. यामुळे पोलिसांनी त्याला ताब्यात घेऊन चौकशी सुरू केली.

    या चौकशीत उमेश राजपूत याने आपण दोनशेच्या बनावट नोटांची आपल्या घरीच छपाई करत असल्याची माहिती दिली. यानुसार पोलिसांनी त्याच्या घरी रात्री उशीरा छापा टाकून बनावट नोटा प्रिंट करण्याची सामग्री जप्त केली. यात दोनशेच्या २३ बनावट नोटा आणि प्रिंटर व शाई आदी सामग्रीचा समावेश होता. या प्रकरणी पहूर पोलीस स्थानकात रात्री उशीरापर्यंत गुन्हा नोंदविण्याचे काम सुरू होते सदरची कारवाई हि जळगाव जिल्हा पोलिस अधीक्षक प्रविण मुंडे, अप्पर पोलीस अधीक्षक रमेश चोपडे, उपविभागीय पोलीस अधिकारी भारत काकडे यांच्या मार्गदर्शनाखाली पहुर स्टेशन चे पोलीस निरीक्षक प्रतापराव इंगळे यांच्या नेतृत्वाखाली करण्यात आली.