Pune Police Commissioner 'heard harsh words' to Metro officials

    पुणे : ‘वाहतूककोंडी’ फोडण्यासाठी पोलीस आयुक्त अमितेशकुमार यांनी स्वतः रस्त्यावर उतरून पाहणी सुरू केली असून, गुरुवारी आयुक्तांनी विद्यापीठ चौकात सतत होणाऱ्या कोंडीबाबत पाहणी केली. त्यावेळी आयुक्तांनी मेट्रोच्या अधिकाऱ्यांना खडेबोल सुनावले. आयुक्त म्हणाले, ‘रस्ते सुस्थितीत ठेवायला अडचण काय आहे? तुम्हाला कितीदा सांगून झाले, रस्त्यांच्या देखभाल दुरुस्तीची जबाबदारी तुमची नाही का? शुक्रवारचा सूर्योदय होण्यापूर्वी रस्त्याची डागडुजी झाली पाहिजे. काम झाल्याशिवाय तुम्ही घरी जाऊ नये. आमच्या सहनशक्तीशी खेळायचे नाही,’ अशा तिखट शब्दात त्यांनी या अधिकाऱ्यांना सुनावले.
    मेट्रो व उड्डाणपुलाचे काम सुरू
    सावित्रीबाई फुले विद्यापीठाजवळील आचार्य आनंदऋषिजी चौकाची गुरुवारी पोलीस आयुक्त अमितेशकुमार यांनी पाहणी केली. याठिकाणी मेट्रो व उड्डाणपुलाचे काम सुरू आहे. त्यामुळे येथील वाहतुकीवर निर्बंध आहेत. परिणामी, गणेशखिंड रस्ता, औंध, बाणेर रस्त्यावर वाहनांच्या रांगा लागतात. प्रचंड वाहतूक कोंडी होते. दररोज वाहन चालकांना याचा त्रास सहन करावा लागतो.
    आचार्य आनंदऋषिजी चौकात दाखल
    यापार्श्वभूमीवर आयुक्त दुपारी एकच्या सुमारास आचार्य आनंदऋषिजी चौकात दाखल झाले. ते गाडीतून उतरले त्याच ठिकाणी असमतोल आणि खडबडीत रस्ता होता. ते पाहून अमितेशकुमार भडकले. ‘एवढी साधी गोष्ट तुम्हाला अनेकदा सांगूनही तुमच्याकडून दुरुस्ती होत नाही,’ अशी शब्दात त्यांनी मेट्रोच्या अधिकाऱ्यांकडे नाराजी व्यक्त केली.
    तुम्हाला किती वेळ लागेल?
    ‘असमतोल रस्ता, खडबडीत रस्ता, भर चौकातील एका ठिकाणी असलेला खड्डा या गोष्टींमुळे वाहनांचा वेग मंदावतो. त्यामुळे वाहनांच्या रांगा लागण्यासाठी आणखी हातभार लागतो. या त्रुटी दूर केल्यास काही प्रमाणात दिलासा मिळेल. ही कामे पूर्ण करण्यासाठी तुम्हाला किती वेळ लागेल,’ असा प्रश्न अमितेशकुमार यांनी पुणेरी मेट्रोच्या अधिकाऱ्यांना केला. त्यावर किमान उद्या रात्रीपर्यंतची मुदत द्यावी, अशी विनंती अधिकाऱ्यांनी केली. यावेळी अतिरिक्त मनोज पाटील, वाहतूक उपायुक्त शशीकांत बोराटे, महापालिकेच्या पथविभागाच्या प्रमुख अनिरुद्ध पावसकर, अधीक्षक अभियंता अमर शिंदे, ‘पीएमआरडीए’च्या मुख्य अभियंता रिनाज पठाण, पुणेरी मेट्रोचे अक्षय शर्मा आणि मारुती श्रीवास्तव, सहायक पोलिस आयुक्त आरती बनसोडे, निरीक्षक राजकुमार शेरे आदी यावेळी उपस्थित होते.
    जड वाहनांच्या वाहतुकीवर निर्बंध
    गणेशखिंड रस्त्यावर जड वाहनांच्या वाहतुकीवर निर्बंध घालण्याचा निर्णय पोलीस आयुक्तांनी घेतला असून, यात सर्व प्रकारच्या अवजड वाहनांना बंदी असेल. तर, महापालिका, मेट्रो  किंवा अन्य कामांसाठी लागणारी वाहने, उदाहरणार्थ- रोड रोलर, जेसीबी आदी प्रकारच्या वाहनांना रात्री नऊ ते सकाळी सहा या वेळेत गणेशखिंड रस्त्यावरून ये-जा करण्यास परवानगी दिली जाईल, असे त्यानी स्पष्ट केले.
    दोन दिवसांतच त्यासंबंधी आदेश
    गणेशखिंड रस्ता, आचार्य आनंदऋषिजी चौक येथील वाहतुकीची परिस्थिती सुधारण्यासाठी शक्य त्या उपाययोजना करण्यात येतील. दोन दिवसांतच त्यासंबंधी आदेश काढून अंमलबजावणी केली जाईल. तसेच, मेट्रो आणि महापालिका प्रशासनाकडून केली जाणारी कामे तातडीने करण्याच्या सूचना केल्या आहेत. – अमितेशकुमार (पोलिस आयुक्त, पुणे शहर)
    १) विद्यापीठ चौकात दोन शिफ्ट मध्ये १०० जणांचा बंदोबस्त ५० वाहतूक शाखेचे कर्मचारी तर ५० वार्डन
    २) वाहतुकीवर नियंत्रण ठेवण्यासाठी मचाण करणार जेणेकरून ज्या रस्त्यावर वाहतूक कोंडी झालेली आहे ती, लगेच दूर करता येईल तसेच विद्यापीठ चौकात एक पोलीस निरीक्षक दोन उपनिरीक्षकांची नेमणूक
    ३) जड वाहने या मार्गावरून पूर्णपणे बंद मनपा मेट्रो तसेच अन्य कामासाठी लागणारी स्लो वाहने उदाहरणार्थ रोड रोलर जेसीबी वगैरे रात्री नऊ ते सकाळी सहा या वेळेतच ये-जा करतील