जयगड येथील संतोष हळदणकर यांच्या मालकीची ही मासेमारी नौका असल्याची माहिती मच्छिमारी विभागाच्या अधिकाऱ्यांनी दिली.
रत्नागिरी – जयगड : रत्नागिरीच्या जयगड समुद्रात बोट बुडाल्याची घटना घडली आहे. मासेमारी करणाऱ्या मिनी पर्ससिन नौकेला अजस्र लाटांच्या तडाख्याने जलसमाधी मिळाली. जयगड दीपगृह येथे किनाऱ्यावरून सुमारे ९ वावामध्ये ही घटना घडली. सुदैवाने त्या बोटीवरील १० खलाशांना बाजूलाच मासेमारी करणाऱ्या अन्य मच्छीमारांनी वाचवले. बोटीवरच्या सर्व खलाशांना वाचवण्यात स्थानिकांना यश आले आहे. नौका बुडाल्यामुळे मच्छीमाराचे लाखो रुपयांचे नुकसान झाले आहे. बोटीवरचा सर्व थरार स्थानिक मच्छीमारांनी आपल्या मोबाईल मध्ये कैद केला आहे.
जयगड येथील मच्छीमार मिनी पर्ससिन घेऊन जयगड समुद्रामध्ये नऊ वावात मासेमारी करीत होते. तेथून परतत असताना सलग तीन अजस्र लाटांचा तडाखा या बोटीला बसला. बोटीत पाणी भरल्याने हळूहळू बोट बुडू लागली. बोटीत १० खलाशी होते. बोट पाण्यात उलटी झाल्यानंतर अनेक खलाशीपान तरंगणाऱ्या बोटीच्या तळावर उभे होते. जवळ मासेमारी करणाऱ्या अन्य बोट मालकांनी एक एक करत खलाशांना बोटीत घेतले. नंतर सर्वांसमोर या मच्छीमारी बोटीला जलसमाधी मिळाली. साई गणेश असे बुडालेल्या मासेमारी नौकेचे नाव आहे. जयगड येथील संतोष हळदणकर यांच्या मालकीची ही मासेमारी नौका असल्याची माहिती मच्छिमारी विभागाच्या अधिकाऱ्यांनी दिली.
मत्स्य विभागाच्या परवाना अधिकाऱ्यांमार्फत उशिरा याची माहिती घेण्याचे काम सुरू होते. मिनी पर्ससिन नौकांमार्फत बेकायदेशीर मासेमारी केली जात असल्याची चर्चा होती. या विना परवाना मासेमारीबाबत पारंपरिक मच्छीमार संघांनी शासनाला निवेदन दिले आहे. आज मिनी पर्ससिन नौका बुडाल्यानंतर किनाऱ्यावर मोठ्या प्रमाणात ही बेकायदेशीर मासेमारी होत असल्याचे स्पष्ट झाले आहे. याबाबत मत्स्य विभाग काय भूमिका घेणार, याकडे सर्वांचे लक्ष आहे. त्यामुळे वातावरणाचा अंदाज घेऊन मच्छीमार मासेमारीसाठी जात आहेत.
Loading ...