उदयनराजेंबद्दल प्रश्न विचारताच शरद पवारांनी उडवली कॉलर; राजकीय वर्तुळात चर्चा

शरद पवार यांनी सातारा लोकसभा निवडणूकीसाठी भाजपचे संभाव्य उमेदवार उदयनराजे भोसले यांच्याबद्दल उत्तर देताना कॉलर उडवत प्रतिक्रिया दिली.

    सातारा : लोकसभा निवडणूकीच्या पार्श्वभूमीवर शरद पवार गटाचे नेते शरद पवार यांनी सातारा दौरा केला आहे. यावेळी त्यांनी निवडणूकीच्या तयारीचा आढावा घेतला. तसेच कार्यकर्त्यांची भेट देखील घेतली. यानंतर शरद पवार यांनी पत्रकार परिषदेला देखील संबोधित केले. यावेळी शरद पवार यांनी सातारा लोकसभा निवडणूकीसाठी भाजपचे संभाव्य उमेदवार उदयनराजे भोसले यांच्याबद्दल उत्तर देताना कॉलर उडवत प्रतिक्रिया दिली. सोशल मीडियावर शरद पवार यांच्या प्रतिक्रियेचे व्हिडिओ व्हायरल होत आहे.

    सातारा लोकसभा निवडणूकीसाठी उदयनराजे भोसले उत्सुक आहेत. यासाठी त्यांनी दिल्लीवारी देखील केली असून अमित शाह यांची भेट घेतली आहे. उदयनराजे परतल्यानंतर त्यांची जंगी मिरवणूक देखील काढण्यात आली. मात्र अद्याप भाजपकडून त्यांच्या नावाची अधिकृत घोषणा करण्यात आलेली नाही. त्यामुळे त्यांनी जर तुमच्याशी संपर्क साधल्यास त्यांच्याशी बोलणार का? असा प्रश्न शरद पवारांना विचारण्यात आला. त्यावर शरद पवार यांनी आता तशी शक्यता नसल्याचे स्पष्ट सांगितले. तसेच पत्रकार म्हणाले की, मग तुम्हीही कॉलर उडविणार का? त्यावर शरद पवारांनी पत्रकार परिषदेतच आपली कॉलर उडवून दाखविली. त्यामुळे पत्रकारांमध्येही जोरदार हशा पिकला.

    पुढे शरद पवार म्हणाले, “उदयनराजे आता भाजपामध्ये आहेत. मी पाहिले दोन दिवसांपूर्वी सातार शहराने त्यांचे संपूर्ण रस्त्यात स्वागत केले. त्यामुळे त्यांनी आमच्याशी संपर्क साधण्याचा विषयच येत नाही, असेही शरद पवार यांनी स्पष्ट केले. २०१९ साली उदयनराजेंनी शरद पवारांशी बंडखोरी करून पोटनिवडणुकीला सामोरे गेल्यानंतर शरद पवार यांनी सातारकरांना चूक सुधारण्याचे आवाहन केले होते. यावेळीदेखील चूक करू नका, असे आवाहन करणार का? असा प्रश्न विचारला असता, ते म्हणाले की, सातारकर चाणाक्ष आहेत. त्यांना आवाहन करण्याची कोणतीही आवश्यकता नाही,” असे मत शरद पवार यांनी व्यक्त केले.