माजी मंत्री, शिवसेनेचे ज्येष्ठ नेते उपनेते म्हणून ओळख असलेले बबनराव घोलप (Babanrao Gholap) यांनी आपल्या उपनेतेपदाचा तसेच शिर्डी लोकसभा संपर्कप्रमुख पदाचा राजीनामा शिवसेना पक्षप्रमुख उद्धव ठाकरे (Uddhav Thackeray) यांच्याकडे पाठविला आहे.
नाशिकरोड : माजी मंत्री, शिवसेनेचे ज्येष्ठ नेते उपनेते म्हणून ओळख असलेले बबनराव घोलप (Babanrao Gholap) यांनी आपल्या उपनेतेपदाचा तसेच शिर्डी लोकसभा संपर्कप्रमुख पदाचा राजीनामा शिवसेना पक्षप्रमुख उद्धव ठाकरे (Uddhav Thackeray) यांच्याकडे पाठविला आहे. दरम्यान, घोलप यांनी घेतलेल्या या निर्णयामुळे शिवसेना ठाकरे गटामध्ये चांगलीच खळबळ उडाली आहे.
बबनराव घोलप शिवसेनेचे ज्येष्ठ नेते असून, 1995 मध्ये शिवसेना व भाजप युतीची सत्ता आली तेव्हा ते कॅबिनेट व जिल्ह्याचे पालकमंत्री होते. पंचवीस वर्ष ते देवळाली मतदारसंघाचे आमदार तर पाच वर्ष त्यांचे पुत्र योगेश घोलप हे आमदार होते. शिर्डी लोकसभा मतदारसंघात त्यांचा दांडगा संपर्क होता. २०१९ च्या निवडणुकीमध्ये त्यांना लोकसभेची उमेदवारी मिळणार होती. मात्र, काही तांत्रिक कारणामुळे त्यांना उमेदवारी स्वीकारता आली नाही. आगामी २०२४ च्या लोकसभा निवडणुकीत शिर्डी मतदारसंघातून घोलप यांना उमेदवारी देण्यात येणार होती. त्या दृष्टीने त्यांनी जोरदार तयारी केली होती.
घोलप समर्थकांमध्ये नाराजीचा सूर
आगामी निवडणुकीत त्यांना उमेदवारी मिळणार हे निश्चित झाले असतानाच घोलप यांना विश्वासात न घेता शिर्डी लोकसभा मतदारसंघाच्या संपर्कप्रमुखपदी माजी आमदार सुनील शिंदे यांची नियुक्ती करण्यात आल्याने बबनराव घोलप व त्यांचे सहकारी नाराज झाले. त्यातच माजी खासदार भाऊसाहेब वाकचौरे यांनी पंधरा दिवसांपूर्वी शिवसेना ठाकरे गटात मातोश्री येथे जाऊन प्रवेश केला.
या प्रवेशामुळे शिर्डी लोकसभा मतदारसंघाची उमेदवारी वाकचौरे यांना मिळणार असल्याचे संकेत मिळत आहेत. या सर्वच निर्णयामुळे बबनराव घोलप व त्यांचे समर्थक नाराज झाले. परिणामी, बबनराव घोलप यांनी आपल्या उपनेतेपदाचा व शिर्डी लोकसभा मतदारसंघाच्या संपर्कप्रमुख पदाचा राजीनामा उद्धव ठाकरे यांच्याकडे पाठविला आहे.
Loading ...