‘आम्ही स्वाभिमानी आणि निष्ठावंत, अशी अनेक पदं ओवाळून टाकू’; गटनेते पदावरून हकालपट्टी झाल्यानंतर संजय राऊतांची पहिली प्रतिक्रिया

शिवसेना पक्षफुटीनंतर शिंदे गट (Shinde Group) आणि ठाकरे गट (Thackeray Group) वेगळे झाले आहेत. त्यात केंद्रीय निवडणूक आयोगाने मुख्यमंत्री एकनाथ शिंदे (CM Eknath Shinde) यांच्या गटाला शिवसेना आणि धनुष्यबाण हे निवडणूक चिन्ह देण्याचा निर्णय घेतला.

मुंबई : शिवसेना पक्षफुटीनंतर शिंदे गट (Shinde Group) आणि ठाकरे गट (Thackeray Group) वेगळे झाले आहेत. त्यात केंद्रीय निवडणूक आयोगाने मुख्यमंत्री एकनाथ शिंदे (CM Eknath Shinde) यांच्या गटाला शिवसेना आणि धनुष्यबाण हे निवडणूक चिन्ह देण्याचा निर्णय घेतला. या सर्व राजकीय घडामोडीनंतर खासदार संजय राऊत (Sanjay Raut) यांची संसदीय गटनेते पदावरून हकालपट्टी करण्यात आली. त्यावर संजय राऊत यांनी पहिली प्रतिक्रिया दिली.

संसदीय गटनेते पदावरून खासदार राऊत यांची हकालपट्टी करण्यात आली. त्यांच्याऐवजी शिंदे समर्थक असलेले खासदार गजानन कीर्तिकर यांच्याकडे गटनेतेपदाचा कार्यभार सोपवण्यात आला. कीर्तिकर हे नवे मुख्य नेते असतील. महाराष्ट्राचे मुख्यमंत्री एकनाथ शिंदे यांनी लोकसभा अध्यक्ष ओम बिर्ला यांना पत्र लिहून याबाबतची माहिती दिली. यावर संजय राऊत यांनी भाष्य केले.

ते म्हणाले, ‘आम्हालाही सांगण्यात आलं, कशाला राहताय? काय राहिलंय तिकडे? आमच्याकडे या…त्यावर मी म्हटलं थुंकतो तुमच्या ऑफरवर…बाळासाहेब ठाकरे, उद्धव ठाकरे आणि शिवसेनेशी बेईमानी करणार नाही. अशी अनेक पद ओवाळून टाकू. आम्ही स्वाभिमानी आणि निष्ठावंत आहोत. आम्ही जर खोके घेत, गुडघे टेकले असते, तर त्या पदावर राहिले असतो, असेही त्यांनी म्हटले आहे.

मुख्य नेतेपदी वर्णी लागताच सत्कार

शिवसेनेच्या राष्ट्रीय कार्यकारिणीची बैठक झाली होती. या बैठकीतील निर्णयानुसार संजय राऊत यांची राज्यसभेतील मुख्य नेते पदावरून हकालपट्टी झाली. तर गजानन कीर्तिकर यांची या पदावर वर्णी लागली. शिवसेना खासदारांनी संसदेतील शिवसेना कार्यालयात गजानन कीर्तिकर यांचा सत्कार केला.