Kolhapurकोल्हापूर शहरात कडकडीत बंद ; शहरातील व्यवहार बंद ठेवून व्यापारी, व्यावसायिकांचा पाठिंबा

कोल्हापूर : जालना येथे सनदशीर मार्गाने आंदोलन करणाऱ्या मराठा समाजावर बेछूट लाठी हल्ला  केल्याच्या निषेधार्थ तसेच या घटनेची नैतिक जबाबदारी स्वीकारून उपमुख्यमंत्री तथा गृहमंत्री देवेंद्र फडणवीस यांनी आपल्या पदाचा राजीनामा द्यावा. या मागणीसाठी सकल मराठा समाजाच्यावतीने कोल्हापुरात कडकडीत बंद पाळण्यात आला. शहरातील सर्व व्यवहार बंद ठेवून व्यापारी व्यावसायिकांनी या बंदला पाठिंबा देऊन बंदमध्ये सहभागी झाले होते.

काल सकल मराठा समाजाच्या वतीने बंदची हाक देण्यात आली होती. बंद मध्ये मराठा समाजातील विविध संघटनासह भाजप पक्ष वगळता अन्य सर्व राजकीय पक्षाच्या स्थानिक कार्यकर्त्यांचा या बंदमध्ये सहभाग होता. आज मंगळवार सकाळी आठ वाजल्यापासून सर्व कार्यकर्ते ऐतिहासिक दसरा चौकात जमायला सुरुवात झाली कार्यकर्त्यांनी शहरातील विविध भागात फिरून बंद करण्याचे आव्हान केले. तर आज बंद असल्याने कुणीही दुकाने उघडली नाहीत.

बंदच्या पार्श्वभूमीवर शहरात सकल मराठा समाजाच्या कार्यकर्त्यांना पोलिसांनी दसरा चौकात थांबण्याचा आग्रह धरला. आजच्या बंदमुळे शहरातील सर्व शाळा, कॉलेज यांना सुट्ट्या देण्यात आल्या होत्या. तर सामान्य नागरिकांची ही शहरात बंद असल्याने फारशी गर्दी दिसून आले नाही. बंद मध्ये व्यापारी, व्यावसायिक, फेरीवाले, टपरी चालक, छोटे विक्रेते, रिक्षाव्यवसायिक मोठ्या संख्येने सहभागी झाले होते. शहरातील बंदमुळे मध्यवर्ती बस स्थानक आवारातील निघणाऱ्या गाड्याच्या फेऱ्या रद्द करण्यात आल्या होत्या. तर के एम टी बस सेवा बंद ठेवण्यात आली होती. मात्र अत्यावश्यक सेवा सुरू करण्यात आल्या होत्या.आजच्या  बंद मुळे शहरात मोठ्या प्रमाणात पोलीस बंदोबस्त ठेवण्यात आला होता चौका चौकातून पोलीस उभा करण्यात आले होते.

 काळ्या िफती बांधून सरकारचा निषेध
दसरा चौक येथे सकल मराठा समाजाच्या कार्यकर्त्यांनी मोठी गर्दी केली होती.‌ यावेळी राज्य सरकारवर टीका करण्यात आली. कार्यकर्त्यांनी डोक्याला काळ्या िफती बांधून सरकारचा निषेध केला. यावेळी सरकार विरोधात जोरदार घोषणाबाजी करण्यात आली.  यावेळी आमदार ऋतुराज पाटील, विजय देवणे, रविकिरण इंगवले, सुनील मोदी, शशिकांत पाटील, गणी आजरेकर, कादर मलबारी बाबा पार्टे बाबा इंदुलकर, बाबा देवकर, शारंगधर देशमुख, अर्जुन माने, मोहन सालपे, दिलीप देसाई, जयकुमार शिंदे, दिगंबर फराकटे, सुशील बांदिगिरे, विजय सावंत दुर्वास कदम संदीप देसाई आदींचा सहभाग होता.

जलद कृती दल दाखल
बंदमध्ये लक्ष्मीपुरी व्यापार पेठेतील व्यापाऱ्यांनी सहभाग घेतल्याने संपूर्ण बाजारपेठेत शांतता होती. तर कोल्हापुरातून कोकण, गोवा, कर्नाटकला जाणाऱ्या एसटी बसच्या फेऱ्या रद्द करण्यात आल्या होत्या. सकाळपासून एक ही बस मध्यवर्ती बस स्थानकातून बाहेर पडली नाही. परिणामी ग्रामीण भागातील परिवहन यंत्रणा यामुळे कोलमडून पडली. शहरात येणाऱ्या सर्व प्रवेश दारावर पोलीस बंदोबस्त मोठ्या प्रमाणात तैनात करण्यात आला होता. बंद दरम्यान कोणताही अनुचित प्रकार घडू नये, यासाठी जिल्हा पोलीस दलाच्या वतीने दसरा चौकात मोठा पोलीस बंद ठेवण्यात आला होता. जलद कृती दल, राज्य राखीव पोलीस दलाच्या तुकड्या कोल्हापुरात दाखल झाल्या होत्या.