येरवड्यात कोयता गँगची दहशत; अल्पवयीन मुलांकडून तोडफोड

येरवड्यात काेयते उगारुन अल्पवयीन मुलांनी दहशत माजविली. अल्पवयीन मुलांनी दुकानांवर दगडफेक करुन वाहनांची तोडफोड केली.

    पुणे : येरवड्यात काेयते उगारुन अल्पवयीन मुलांनी दहशत माजविली. अल्पवयीन मुलांनी दुकानांवर दगडफेक करुन वाहनांची तोडफोड केली. याबाबत पोलीस कर्मचारी अजित वाघुले यांनी फिर्याद दिली आहे. त्यांनी दिलेल्या फिर्यादीनुसार चार अल्पवयीन मुलांविरुद्ध गुन्हा दाखल करण्यात आला आहे.

    दोन दिवसांपूर्वी अल्पवयीन मुले कोयते घेऊन येरवडा भागातील रामनगर भागात आले. त्यांनी शिवीगाळ करुन कोयते उगारले. दोन दुकानांमध्ये शिरुन तोडफोड केली. रस्त्याच्या कडेला लावलेल्या दोन मोटारी, दोन दुचाकींची तोडफोड केली. नागरिकांना धमकावून अल्पवयीन मुलांनी कोयते उगारले. त्यानंतर टोळक्याने येरवडा भागातील सादलबाबा चौकातील मद्यविक्री दुकानासंह तीन दुकानांमध्ये शिरुन काचा फोडल्या. अल्पवयीन मुले पसार झाली.

    दरम्यान या घटनेची माहिती मिळाल्यानंतर पोलिसांनी घटनास्थळी धाव घेतली. दहशतीमुळे नागरिकांनी तक्रार न दिल्याने पोलिसांनी याप्रकरणी स्वत:हून तक्रार दिली. गंभीर गुन्ह्यात अल्पवयीन मुले सामील झाल्याने चिंतेचा विषय ठरला आहे. गुन्हेगारीच्या आकर्षणापाेटी अल्पवयीन मुले गंभीर गुन्हे करत असल्याने पोलीस ठाण्यांना अल्पवयीन मुलांचे समुपदेशन करण्याचे आदेश देण्यात आले आहे.