मुख्यमंत्र्यांचे पुत्र श्रीकांत शिंदे यांच्या विरोधात ठाकरे गटाच्या वैशाली दरेकर निवडणुकीच्या रिंगणात

लोकसभा निवडणुकीच्या पार्श्वभूमीवर ठाकरे गटाने आतापर्यंत 21 उमेदवारांची घोषणा केली असून, शिवसेना ठाकरे गटाने आज उमेदवारांची दुसरी यादी जाहीर केली असून यामध्ये चार नावांचा समावेश आहे. यात बहुचर्चित कल्याण मतदारसंघात मुख्यमंत्री पुत्र श्रीकांत शिंदे यांच्या विरोधात ठाकरे गटाने वैशाली दरेकर यांना उमेदवारी दिली आहे.

    मुंबई : लोकसभा निवडणुकीच्या पार्श्वभूमीवर ठाकरे गटाने आतापर्यंत 21 उमेदवारांची घोषणा केली असून, शिवसेना ठाकरे गटाने बुधवारी (दि.४) उमेदवारांची दुसरी यादी जाहीर केली. यामध्ये चार नावांचा समावेश आहे. यात बहुचर्चित कल्याण मतदारसंघात मुख्यमंत्री पुत्र श्रीकांत शिंदे यांच्या विरोधात ठाकरे गटाने वैशाली दरेकर यांना उमेदवारी दिली आहे.

    ठाकरे यांनी हातकणंगलेमधून सत्यजित पाटील आणि पालघरमधून भारती कामडी यांना तर नुकतेच उन्मेष पाटील यांच्यासोबत भाजपमधून ठाकरे गटात पक्षप्रवेश केलेले करण पवार यांना जळगावमधून लोकसभेचे तिकीट दिले आहे.

    सांगलीबाबत पुनर्विचार नाही

    सांगलीच्या जागेचा पुनर्विचार होणार नाही. अमरावतीसह अन्य ठिकाणचे शिवसैनिकही नाराज आहेत. आम्ही प्रचाराला सुरुवात करत आहोत. सांगलीसह सगळीकडे शिवसेनेच्या प्रचाराला सुरुवात करावी, असे उद्धव ठाकरे यांनी काँग्रेसला थेटपणे सांगितले आहे. यावर, मैत्रीपूर्ण लढत होणार का, यावर बोलताना उद्धव ठाकरे म्हणाले की, मैत्रीपूर्ण लढत होत नाही. एकतर मैत्री करा किंवा थेट लढत द्या, असे आव्हान उद्धव ठाकरेंनी दिले.

    आता काँग्रेसनेही प्रचाराला सुरुवात करावी

    सांगलीचा उमेदवार आम्ही जाहीर केला आहे. आताही चार उमेदवारांच्या नावाची घोषणा केली आहे. लवकरच संजय राऊत तिथे जाणार आहेत. आम्ही तिथे प्रचाराला सुरुवात करणार आहोत. अन्य ठिकाणी आमचे उमेदवार नाहीत. पण काँग्रेसचे उमेदवार आहेत. पूर्व विदर्भात आमच्याकडे एकही जागा नाही. त्या भागातील शिवसैनिक नाराज आहेत. पण, मी शिवसैनिकांना समजावले आहे. त्यानुसार शिवसैनिकांनी काँग्रेसचा प्रचार सुरू केला आहे. तसा सांगलीसह जिथे जिथे शिवसेनेचे उमेदवार आहेत, तिथे काँग्रेसने प्रचाराला सुरुवात करावी, असे शिवसेना ठाकरे गटाचे प्रमुख उद्धव ठाकरे यांनी काँग्रेसला बजावले.