नरेंद्र मोदी यांच्या कर्तृत्वात अगणित लघुपट निर्मितीची ताकद; चंद्रकांत पाटील यांचे प्रतिपादन

पंतप्रधान नरेंद्र मोदी यांचे कर्तृत्व इतके मोठे आहे की, त्यांच्या कर्तृत्वावर अगणित लघुपट निर्माण होऊ शकतात, असे प्रतिपादन भाजपा प्रदेशाध्यक्ष आ. चंद्रकांत पाटील यांनी केले. भाजपा सांस्कृतिक प्रकोष्ठच्यावतीने आयोजित ‘कर्मयोगी नमो’ लघुपट स्पर्धेतील विजेत्यांचा रविवारी कोथरुड मधील यशवंतराव चव्हाण नाट्यगृहात मान्यवरांच्या हस्ते गौरव करण्यात आला. या कार्यक्रमात ते बोलत होते.

    पुणे : पंतप्रधान नरेंद्र मोदी यांचे कर्तृत्व इतके मोठे आहे की, त्यांच्या कर्तृत्वावर अगणित लघुपट निर्माण होऊ शकतात, असे प्रतिपादन भाजपा प्रदेशाध्यक्ष आ. चंद्रकांत पाटील यांनी केले. भाजपा सांस्कृतिक प्रकोष्ठच्यावतीने आयोजित ‘कर्मयोगी नमो’ लघुपट स्पर्धेतील विजेत्यांचा रविवारी कोथरुड मधील यशवंतराव चव्हाण नाट्यगृहात मान्यवरांच्या हस्ते गौरव करण्यात आला. या कार्यक्रमात ते बोलत होते.

    यावेळी ज्येष्ठ अभिनेते विक्रम गोखले, नाट्य व सिनेअभिनेते प्रशांत दामले, अभिनेत्री मृणाल कुलकर्णी, मानसी मागीकर, युवा अभिनेते आरोह वेलणकर, भाजपा पुणे शहर अध्यक्ष जगदीश मुळीक, संघटन सरचिटणीस राजेश पांडे, माजी महापौर मुरलीधर मोहोळ, सांस्कृतिक आघाडीचे प्रदेश संयोजक ॲड. शैलेश गोजमगुंडे, प्रदेश प्रभारी लक्ष्मण सावजी, भाजपा कोथरूड मंडल अध्यक्ष पुनीत जोशी, पुणे शहर प्रवक्ते संदीप खर्डेकर यांच्या सह भाजपाचे सर्व पदाधिकारी आणि नागरीक उपस्थित होते.

    चंद्रकांत पाटील म्हणाले की, देशाचे लोकप्रिय पंतप्रधान नरेंद्र मोदी यांचे कर्तृत्व इतके मोठे आहे की, त्यावर अगणित लघुपट निर्माण होऊ शकतात. कोविड आणि त्यानंतरच्या काळातील मोदीजींच्या अनेक निर्णयांमुळे देशाचा संपूर्ण जगात नावलौकिक वाढला. कोविडनंतर रशिया आणि युक्रेनमधील युद्धामुळे संपूर्ण जगाला इंधन टंचाईचा सामना करावा लागला. त्यातून आपल्या शेजारील पाकिस्तानसह अनेक देशांचे अर्थचक्र कोलमडले. पण माननीय मोदीजींच्या कणखर नेतृत्वामुळे देशवासियांना इंधन टंचाई किंवा महागाईच्या झळा सहन कराव्या लागल्या नाहीत.

    राजीव गांधीजींचा दाखला देऊन ते पुढे म्हणाले की, राजीव गांधी पंतप्रधान असताना गरीब कल्याणासाठी केंद्र सरकार एक रुपया खर्च करत होते. त्यापैकी दहा पैसेच लाभार्थ्याच्या हातात पोहोचायचे. राजीवजी देखील हे जाहीरपणे बोलून दाखवायचे. पण माननीय मोदीजी पंतप्रधान झाल्यावर त्यांनी सर्वात प्रथम जनधन योजनेच्या माध्यमातून कोट्यवधी गरीब कुटुंबातील व्यक्तींचे बॅंकेत खाते सुरू केले, अन् या खात्यात केंद्र सरकारच्या विविध योजनांचे पैसे डीबीटीच्या माध्यमातून जमा करायला सुरुवात केली. त्यामुळे लाभार्थ्यांना सरकारच्या योजनांचा थेट लाभ मिळू लागला. तेव्हा माननीय मोदीजींच्या असाधारण कर्तृत्वामध्ये अगणित लघुपट निर्माण होण्याची ताकद आहे. त्यामुळे पुढील वर्षी देखील अशाच प्रकारची स्पर्धा भाजपा सांस्कृतिक प्रकोष्ठच्या वतीने आयोजित करावी, त्या माध्यमातून गरीब कल्याणाचे कार्य जनतेपर्यंत पोहोचवण्यास मदत मिळेल, अशी सूचना त्यांनी यावेळी केली.

    ज्येष्ठ अभिनेते विक्रम गोखले म्हणाले की, स्वातंत्र्यवीर सावरकर आणि लोहपुरुष सरदार वल्लभभाई पटेल यांच्यानंतर माननीय नरेंद्रजी मोदी हे देशाला सापडलेलं अलैकीक व्यक्तिमत्त्व आहे. स्वातंत्र्यवीर सावरकर, सरदार वल्लभभाई पटेल आणि मोदीजींनी देशासाठी झिजायला शिकवलं. त्यामुळे अशा व्यक्ती सर्वांसाठी वंदनीय आहेत. आज संपूर्ण देशातील हिंदूंनी एकजूट होऊन देशासाठी अहोरात्र झिजणाऱ्या व्यक्तींच्या पाठिशी ठामपणे उभे राहिले पाहिजे, अशी अपेक्षा व्यक्त केली.

    यावेळी प्रसिद्ध सिने आणि नाट्य अभिनेते प्रशांत दामले आणि अभिनेत्री मृणाल कुलकर्णी यांनीही आपले मनोगत व्यक्त केले. कार्यक्रमाचे प्रास्ताविक ॲड. शैलेश गोजमगुंडे यांनी केले. उमेश घळसासी यांनी उपस्थितांचे आभार मानले. या संपूर्ण कार्यक्रमाचे सूत्रसंचालन स्नेहल दामले यांनी केले.

    दरम्यान भाजपा सांस्कृतिक प्रकोष्ठच्या वतीने आयोजित ‘कर्मयोगी नमो’ लघुपट स्पर्धेत १३५ स्पर्धकांनी भाग घेतला होता. त्यापैकी अमरावतीच्या संज्ञा मीडिया प्रकाशन, रंगशाळा निर्मित आणि धनंजय कानबाळे दिग्दर्शित राष्ट्रीय संरक्षणावर आधारित ‘दोन कप चहा’ या लघुपटास प्रथम पुरस्काराने गौरविण्यात आले. ७५ हजार रुपयाचा धनादेश, स्मृतिचिन्ह आणि प्रमाणपत्र असे पुरस्काराचे स्वरूप होते. तर पनवेलच्या सत्यधर्मा प्रोडक्शने स्वच्छ भारत विषयावरील ‘सेल्फी पॉईंट’चा द्वितीय आणि मुंबईच्या यामिनी पटेल दिग्दर्शित ‘अक्षरण मोदी’ या लघुपटास तृतीय क्रमांकाचे पारितोषिक देऊन गौरविण्यात आले. त्यातील द्वितीय क्रमांक विजेत्यांना ५१ हजार रुपये स्मृतिचिन्ह आणि प्रमाणपत्र; तर तृतीय क्रमांक विजेत्यांना ३१ हजार रुपये स्मृतिचिन्ह आणि प्रमाणपत्र देण्यात आले.