पुणे शहरातून (Pune City) दुचाकी चोरून पसार झालेल्या एका चोरट्याने पोलिसांपासून वाचण्यासाठी चक्क स्वत:च्या मृत्यूचा बनाव केल्याचा धक्कादायक प्रकार समोर आला आहे. कोथरूड (Kothrud) पोलिसांनी या चोरट्याला बेड्या ठोकल्या आहेत.
पुणे : पुणे शहरातून (Pune City) दुचाकी चोरून पसार झालेल्या एका चोरट्याने पोलिसांपासून वाचण्यासाठी चक्क स्वत:च्या मृत्यूचा बनाव केल्याचा धक्कादायक प्रकार समोर आला आहे. कोथरूड (Kothrud) पोलिसांनी या चोरट्याला बेड्या ठोकल्या आहेत. त्याने कोथरूड भागातून दुचाकी चोरल्यानंतर ती मध्यप्रदेश येथे विकली होती. विशेष म्हणजे, त्याने नातेवाईकांमार्फत मध्यप्रदेशातील एका वर्तमानपत्रात मृत्यूची बातमी देखील छापून आणली होती.
विवेक मिश्रा (रा. महेर, जि. सतना, मध्यप्रदेश) असे अटक करण्यात आलेल्या चोरट्याचे नाव आहे. याप्रकरणी कोथरूड पोलीस ठाण्यात वाहन चोरीचा गुन्हा दाखल आहे. ही कारवाई परिमंडळ तीनचे उपायुक्त सुहेल शर्मा यांच्या मार्गदर्शनाखाली वरिष्ठ पोलीस निरीक्षक हेमंत पाटील, उपनिरीक्षक माळी, चौधर, सुळ, शिर्के, राठोड, वाल्मिकी, दहिभाते, शेळके आदींनी केली.
मृत्यू झाल्याचा केला बनाव
मिश्रा याचे कोथरुड भागात पंक्चरचे दुकान होते. वर्षभरापूर्वी त्याने कोथरुडमधील पौड परिसरातून दुचाकी चोरली होती. चोरीनंतर मिश्रा मूळगावी गेला. त्याने पोलिसांपासून वाचण्यासाठी मध्यप्रदेशात नातेवाईकांमार्फत स्वत:च्या मृत्यूची बातमी एका वर्तमानपत्रात छापून आणली. मिश्राचा मृत्यू झाल्याची माहिती पोलिसांना प्राथमिक तपासात मिळाली होती. त्यानंतर मध्यप्रदेशातील मिश्रा याच्या मूळगावी पोलिसांचे पथक गेले होते. तेव्हा त्याचा मृत्यू झाल्याची माहिती पोलिसांना नातेवाईकांनी दिली. वृतपत्रातील मृत्यूच्या बातमीचे कात्रण त्यांनी तपास पथकाला दाखविले होते, असे वरिष्ठ पोलीस निरीक्षक हेमंत पाटील यांनी सांगितले.
चोरटा पोलिसांच्या ताब्यात
मात्र, पोलीस चोरीच्या गुन्ह्यांचा तपास करत असताना तपासात मिश्रा हयात असल्याचे समजले. त्यानंतर पोलिसांनी तपासाला सुरूवात केली व त्याचा माग काढला. त्यावेळी तो चोरी केलेली दुचाकी वापरत होता. दुचाकीच्या वाहन पाटीवरील क्रमांक बदलून तो पुण्यात आल्याची माहिती तपास पथकातील पोलीस उपनिरीक्षक माळी व दहिभाते यांना मिळाली. त्यानंतर त्याला सापळा लावून ताब्यात घेतले. त्याच्याकडून वाहन चोरीचे दोन गुन्हे उघडकीस आले आहेत.
