यवतमाळमधील भीषण अपघातात दोन युवकांचा मृत्यू, घटनास्थळावरून कार चालक फरार

दिवसभराचे काम आटपून घरी परत जात असताना दोन तरुणांचा अपघात झाला. या अपघातामध्ये दुचाकीला कारने जोरदार धडक दिल्याने हा अपघात झाल्याचे पोलिसांकडून सांगण्यात आले आहे.

    राज्यभरात सगळीकडे रस्ते अपघातांमध्ये वाढ झाली आहे. सतत होत असलेल्या अपघातांमध्ये अनेक आपला जीव देखील गमवावा लागला आहे. यवतमाळच्या (Yavatmal) दारव्हा तालुक्यामध्ये घडलेल्या भीषण अपघातात दोन तरुणांना आपला जीव गमवावा लागला आहे. या भीषण अपघातामुळे संपूर्ण तालुक्यावर शोककळा पसरली आहे. दिवसभराचे काम आटपून घरी परत जात असताना दोन तरुणांचा अपघात झाला. या अपघातामध्ये दुचाकीला कारने जोरदार धडक दिल्याने हा अपघात झाल्याचे पोलिसांकडून सांगण्यात आले आहे. ज्या कारने दुचाकीला धडक दिली ती कार तहसीलदारांची असल्याचे पोलिसांकडून सांगण्यात आले आहे. अपघात घडल्यानंतर वाहनचालक घटना स्थळावरून पळून गेल्याने पोलिसांकडून त्याचा शोध सुरु आहे.

    यवतमाळमधील बोरी अरब येथून काम पूर्ण करून दोन तरुण घराकडे जाण्यासाठी निघाले होते. तेव्हा रस्त्यात कार आणि दुचाकीचा अपघात झाला. शहराजवळ असणाऱ्या एका मंदिराच्या परिसरात मागून येणाऱ्या कारने दुचाकीला धडक दिली. हा अपघात एवढा भीषण होता की यामध्ये एका युवकाचा मृत्यू घटनास्थळावर झाला तर एका युवकाचा मृत्यू रुग्णालयात उपचारदरम्यान झाला. अपघातस्थळी धडक दिलेली कार ही तहसीलदारांची असल्याचे समोर आले आहे. अंकुश देवराव भोजने आणि श्रीकांत प्रमोद ठाकरे असे मृत्यू झालेल्या तरुणांची नावे आहेत.

    अपघाताची माहिती मिळताच पोलीस घटनास्थळी लगेच दाखल झाले. मात्र अपघात केलेली कार घटनास्थळावरून फरार झाली आहे. ही कार तहसीलदार परसराम भोसले यांच्या मालकीचे असल्याने पोलिसांकडून या घटनेचा अधिक तपास केला जात आहे. कार कोण चालवत होत? याचा पोलीस तपास करत आहेत. या प्रकरणी पोलिसांनी अज्ञात चालकाविरोधात गुन्हा दाखल केला आहे. तसेच या घटनेचा अधिक तपास पोलीस उपनिरीक्षक धनंजय रत्नपारखी करत आहेत. सतत होत असलेले रस्ते अपघात थांबवण्यासाठी अनेक प्रयत्न केले जात आहेत. मात्र अपघातांची मालिका सुरु असल्याने अनेकांना आपला जीव गमवावा लागला आहे. यामुळे रस्ते महामार्गावरून प्रवास करणाऱ्या प्रवाशांना आपला जीव धोक्यात घालून प्रवास करावा लागत आहे.