पिंपरी-चिंचवड पोलिसांच्या वाहतूक शाखेत गाड्या उचलण्यासाठी लावलेला टेम्पो सस्पेंड केल्यावरून भाच्याने मामावर कुऱ्हाडीने वार करून जीवे ठार मारण्याचा प्रयत्न केल्याची घटना घडली.
पुणे : पिंपरी-चिंचवड पोलिसांच्या वाहतूक शाखेत गाड्या उचलण्यासाठी लावलेला टेम्पो सस्पेंड केल्यावरून भाच्याने मामावर कुऱ्हाडीने वार करून जीवे ठार मारण्याचा प्रयत्न केल्याची घटना घडली. टेम्पो सस्पेंड मामामुळेच झाल्याचा संशय आल्याने हा प्रकार घडला. याप्रकरणी समर्थ पोलीस ठाण्यात भाच्चा प्रविण देवदास जगधने (रा. राजेवाडी) याच्यावर गुन्हा दाखल केला आहे. तर मामा अभिषण रणदिवे (वय ३८) हे जखमी झाले आहेत. मध्यरात्री नाना पेठेतील राजेवाडीत ही घटना घडली आहे.
पोलिसांनी दिलेल्या माहितीनुसार, तक्रारदार व आरोपी मामा-भाचे आहेत. प्रविण जगधने याचा टेम्पो पिंपरी-चिंचवड पोलीस दलातील वाहतूक शाखेत गाड्या उचलण्यासाठी होता. परंतु, दोन महिन्यांपूर्वी जगधनेने महानगर पालिकेची पावती स्वतःच्या नावावर गुगल पे ने घेतल्याने त्याचा टेम्पो त्या ठिकाणाहुन सस्पेंड करण्यात आला होता. त्या घटनेस आपला मामा रणदिवे हे कारणीभूत असल्याच्या संशय घेतला. १८ डिसेंबर रोजी तो त्याच्या घरात शिरला. यावेळी ते आणि त्यांची मुलगी घरात होती.
टेम्पो मामानेच काढल्याचा गैरसमजातून त्याने त्यांच्यावर खल्लास करतो म्हणत कुर्‍हाडीने वार करून खुनाचा प्रयत्न केला. तसेच मी इथला भाई आहे असे मोठ्याने ओरडुन कुर्‍हाड हवेत फिरवून दहशत पसरवली म्हणून गुन्हा दाखल करण्यात आला आहे. अधिक तपास पोलीस करत आहेत.
Loading ...