म्हणून मोदी सरकारनं कृषी कायदे मागे घेतले; पवारांनी सांगितलं नेमकं कारण

    चंद्रपूर (Chandrapur) : शेतकऱ्यांच्या प्रखर विरोधापुढं झुकून केंद्रातील मोदी सरकारनं अखेर तिन्ही कृषी कायदे (Farm Laws Repeal) मागे घेण्याची घोषणा केली आहे. केंद्राच्या या निर्णयावर वेगवेगळ्या प्रतिक्रिया व्यक्त केल्या जात आहेत. माजी केंद्रीय कृषीमंत्री व राष्ट्रवादी काँग्रेसचे अध्यक्ष शरद पवार (Sharad Pawar) यांनी या निर्णयावर प्रतिक्रिया देताना केंद्र सरकारवर निशाणा साधला आहे.

    चंद्रपूरमध्ये झालेल्या पत्रकार परिषदेत ते बोलत होते. केंद्र सरकारच्या आजच्या निर्णयावर प्रतिक्रिया देताना शरद पवार यांनी कृषी कायद्यांच्या संबंधीच्या इतिहासाचा आढावा घेतला. ‘कृषी कायद्यांसंदर्भात अनेक दिवसांपासून चर्चा सुरू होती. कृषी क्षेत्रात सुधारणा व्हाव्यात, गुंतवणुकीला वाव मिळावा, शेतकऱ्याला चांगला मोबदला मिळावा, शेती मालाला जागतिक बाजारपेठ मिळावी, याचा विचार केंद्र सरकारकडून सुरू होता. मी स्वत: दहा वर्षे देशाचा कृषीमंत्री होतो. माझ्यासोबत या संदर्भात सविस्तर चर्चा झाल्या. त्यावेळी कायद्यामध्ये दुरुस्ती करावी की काय? असाही विचार सुरू होता. मात्र, हा निर्णय दिल्लीत बसून घेतला जाऊ नये असं माझं मत होतं.

    आपल्या घटनेनुसार, कृषी हा विषय राज्य सरकारचा विषय आहे. त्यामुळं राज्य सरकारला विश्वासात घेऊन राज्याचे प्रतिनिधी, कृषी विद्यापीठं, कृषी धारकांच्या संघटना यांना विश्वासात घेऊन आपण याबाबत निर्णय घ्यायचा, असं आम्ही ठरवलं. त्यानुसार मी कृषी मंत्री म्हणून देशातील सर्व राज्यांचा कृषी, पणन व सहकार या खात्यांच्या मंत्र्यांच्या बैठका घेतल्या. सविस्तर चर्चा केली होती. मात्र पुढं सरकार बदलल्यानं काही ठोस करता आलं नाही, असं पवारांनी सांगितलं.

    ‘मोदी सरकारनं तीन कायदे एकाच वेळी सभागृहात आणले. त्याबाबत राज्यांच्या विधानसभांमध्ये चर्चा घडवून आणणं, लोकसभा वा राज्यसभेच्या सर्व सदस्यांसोबत करणं, शेतकरी संघटनांसोबत चर्चा करणं असं काहीच झालं नाही. तीनही कायदे अवघ्या काही तासांत मंजूर करण्यात आले. सरकारची ही भूमिका अतिरेकी होती हे आता सिद्ध झालं,’ असं पवार म्हणाले.

    ‘पंजाब, उत्तर प्रदेशात आता निवडणुका येऊ घातल्या आहेत. भाजपचे प्रतिनिधी गावात गेल्यावर तिथं लोक विचारतील, तेव्हा त्यांना उत्तर देता येणार नाही. त्यामुळंच केंद्र सरकारनं आता हा निर्णय घेतला आहे,’ असं पवार म्हणाले.