विधानपरिषदेच्या निवडणुकीसाठी आज मतदान

विधानपरिषदेच्या निवडणुकीसाठी आज सोमवारी मतदान होत आहे. राज्यसभेच्या निवडणुकीनंतर आता भाजपने या निवडणुकीमध्येदेखील महाविकास आघाडीला धक्का देण्याची रणनीती आखली आहे.

    विधानपरिषदेच्या निवडणुकीसाठी (MLC Election) आज मतदान (Voting) होत आहे. राज्यसभेच्या निवडणुकीनंतर (Rajyasabha Election) आता विधानपरिषदेतही धक्कादायक निकालाची परंपरा सुरू राहणार का, हे काही तासांमध्ये स्पष्ट होणार आहे. एकूण १० जागांसाठी सकाळी ९ ते दुपारी ४ यावेळेत मतदान होणार आहे. त्यानंतर संध्याकाळी ५ वाजता मतमोजणी सुरू होणार आहे. राज्यसभेच्या निवडणुकीत झालेल्या दगाफटक्यानंतर महाविकास आघाडी (MVA) सावध झाली आहे. तर भाजपने (BJP) या निवडणुकीतही चमत्कार करून दाखवण्याचा विश्वास व्यक्त केला आहे.

    विधानपरिषदेच्या निवडणुकीसाठी आज सोमवारी मतदान होत आहे. राज्यसभेच्या निवडणुकीनंतर आता भाजपने या निवडणुकीमध्येदेखील महाविकास आघाडीला धक्का देण्याची रणनीती आखली आहे. दहाव्या जागेसाठी काँग्रेसचे (Congress) भाई जगताप (Bhai Jagtap) आणि भाजपचे प्रसाद लाड (Prasad Lad) यांच्यात लढत होणार आहे. त्यामुळे विधानपरिषदेची खरी लढत ही काँग्रेस आणि भाजपमध्येच असल्याचे दिसून येत आहे.

    काँग्रेसकडून चंद्रकांत हंडोरे आणि भाई जगताप विधानपरिषद निवडणूकीच्या रिंगणात आहेत. विधानपरिषद निवडणुकीत मुख्य लढत भाई जगताप विरूद्ध प्रसाद लाड अशी रंगणार आहे. भाई जगताप मुंबई काँग्रेस अध्यक्ष असल्याने महापालिका निवडणुकीच्या पार्श्वभूमीवर काँग्रेसकरता ही निवडणूक प्रतिष्ठेची आहे. दुसऱ्या क्रमांकाचे उमेदवार भाई जगताप असल्याने त्यांची मदार प्रेफरन्शिअल व्होटिंग आणि अपक्षांवर आहे. काँग्रेस आमदारांचे संख्याबळ ४४ आहे. पहिले उमेदवार चंद्रकांत हंडोरेंना जिंकण्याकरता २६ मते मिळू शकतील. मात्र, भाई जगतापांना जिंकण्याकरता ८ मते कमी पडत आहेत. शिवसेनेकडील अतिरिक्त मते काँग्रेसकडे वळवून घेण्याचा काँग्रेस नेत्यांचा प्रयत्न आहे. तसेच, राष्ट्रवादी आणि शिवसेना समर्थक असलेल्या अपक्ष आणि लहान पक्षांची मते काँग्रेसकडे वळवण्याचेही प्रयत्न सुरू आहेत.