राज्यातील ऊस उत्पादक शेतकऱ्यांना गेल्या वर्षी तुटलेल्या ऊसाला ४०० रुपये दुसरा हप्ता आणि चालू वर्षी गळीत हंगामातील पहिली उचल ३५०० रुपये दिल्यास मी २०२४ची लोकसभा निवडणूक लढविणार नाही, असे राजू शेट्टी यांनी सांगितले.
कोल्हापूर : आमदार प्रकाश आवाडे यांची देशाचे सहकारमंत्री व राज्याचे मुख्यमंत्री व दोन्ही उपमुख्यमंत्री यांच्याशी सलगी आहे. राज्यातील ऊस उत्पादक शेतकऱ्यांना गतवर्षी तुटलेल्या ऊसाला ४०० रूपये दुसरा हप्ता व चालूवर्षी गळीत हंगामातील पहिली उचल ३५०० रूपये दिली, तर मी आगामी लोकसभा निवडणूक लढविणार नाही, असा निर्धार स्वाभिमानी शेतकरी संघटनेचे नेते राजू शेट्टी यांनी जयसिंगपूर येथील ठिय्या आंदोलनस्थळी रविवारी बोलून दाखवला.
निवडणुका डोळ्यांसमोर ठेवून चळवळीच्या माध्यमातून राजकारण करत असल्याचा आरोप आमदार प्रकाश आवाडे यांनी राजू शेट्टी यांच्यावर केला. या आरोपाला उत्तर देताना शेट्टी म्हणाले, दिवाळीच्या शुभेच्छा देत असताना शेतकरी चळवळीवर गरळ ओकण्याचे व शेतकऱ्यांच्या मनामध्ये भीती निर्माण करण्याचे काम आमदार आवाडे करत आहेत.
जिल्ह्यामध्ये दुष्काळाची परिस्थिती आहे, हे मी नाकारणार नाही. मात्र आमदार आवाडे भीती दाखवितात, अशी परिस्थिती नाही. जिल्ह्यातील धरणामध्ये गेल्या वर्षी असणारा पाणीसाठा व आजच्या दिवशी असणारा पाणीसाठा याची परिस्थती पाहिल्यास जर व्यवस्थित व काटकसरीने पाणी सोडण्याचे नियोजन केले, तर मे अखेरपर्यंत पाणी पुरवठा होवू शकतो. मात्र राज्यकर्त्यांनी सरकारमध्ये असलेला आपला अधिकार वापरून शेतकऱ्यांचा काटा काढायचे ठरवले आहे, या सुडापोटी धरणामध्ये पाणीसाठा असतानाही धरणातून पाणी न सोडणे व कृषी पंपांचा विद्युत पुरवठा खंडीत करणे, यांसारखे प्रकार होऊ लागले आहेत.
दुकानदारीसाठी तुमचे राजकारण
आमदार प्रकाश आवाडे यांनी पाठिंबा दिलेल्या केंद्र व राज्य सरकारने खताचे दर भरमसाठ वाढविले आहेत. यामुळे शेतकऱ्यांचे आर्थिक गणित कोलमडले आहे. मी चळवळीसाठी जगणारा व राजकारण करणारा माणूस आहे. मला राज्यातील शेतकरी सुखी झालेले पाहायचे आहेत. तुमचे मात्र तसे नाही. तुमची दुकानदारी चालविण्यासाठी तुम्ही राजकारण करता, असा टोला शेट्टी यांनी आवाडे यांना लगावला.
पिता-पूत्र खुशाल लोकसभा लढवा
जर राज्यातील ऊस उत्पादक शेतकऱ्यांना गतवर्षी तुटलेल्या ऊसाला ४०० रूपये दुसरा हप्ता व चालूवर्षी गळीत हंगामातील पहिली उचल ३५०० रूपये दिल्यास मी २०२४ ची लोकसभा निवडणूक लढविणार नाही. तुम्ही अथवा तुमच्या मुलाला खुशाल लोकसभेसाठी ऊभे करा. याला माझा पाठिंबा असल्याचे मत शेट्टी यांनी व्यक्त केले.
Loading ...