बाळासाहेबांचे स्वीय सहाय्यक उद्धव ठाकरेंच्या मदतीला; नार्वेकरांचा पत्ता कट?

बाळासाहेबांच्या निधनानंतरही रवी म्हात्रे हे ठाकरे कुटुंबियांसोबत होते. त्यानंतर मध्यतरीच्या काळात ते सक्रीय नव्हते. बाळासाहेबांसोबत असताना रवी म्हात्रे यांच्याकडे शाखाप्रमुखांसह, आमदार, खासदार आपल्या समस्या घेऊन रवी म्हात्रे यांच्याशी संपर्क साधायचे. त्यावेळी रवी म्हात्रे शिवसैनिकांमधील दुवा होते.

    मुंबई : एकनाथ शिंदे (Eknath Shinde) यांच्या बंडामुळे राज्यातील राजकारणासह शिवसेनेतही (Shivsena) मोठे बदल झाले. राजकीय समीकरणांसोबत शिवसेनेतील अंतर्गत गोष्टीही बदलू लागल्या आहेत. शिवसेनेत उद्धव ठाकरे (Uddhav Thackeray) यांच्या सर्वात जवळची व्यक्ती म्हणून मिलिंद नार्वेकर (Milind Narvekar) यांचे नाव घेतले जात होते. मात्र, आता शिवसेना प्रमुख बाळासाहेब ठाकरे यांच्या विश्वासू व्यक्तीने प्रवेश केला आहे. त्यामुळे नार्वेकरांचा पत्ता कट होणार का, अशी चर्चा आहे.

    एकनाथ शिंदेंच्या बंडानंतर बाळासाहेबांच्या मर्जीतील रवी म्हात्रे (Ravi Mhatre) यांच्या नावाची जोरदार चर्चा आहे. उद्धव ठाकरेंसोबत त्यांच्या वाढलेल्या वावराबाबत काही दिवसांपासून मोठी चर्चा आहे. २१ सप्टेंबर रोजी शिवसेनेच्या गटप्रमुखांचा मेळावा पार पडला. या मेळाव्यात उद्धव ठाकरेंच्या अवतीभोवती रवी म्हात्रे पाहायला मिळाले. मागील काही काळ ते सक्रीय नव्हते. मात्र, आता हातात फाईल घेऊन अचानक रवी म्हात्रेंचा प्रवेश झाल्याने चर्चा होते आहे.

    रवी म्हात्रे हे शिवसेनाप्रमुख बाळासाहेब ठाकरे यांचे जवळचे खास आहेत. ते बाळासाहेबांचे सहाय्यक होते. २००४ पासून ते बाळासाहेबांचे सहाय्यक म्हणून काम पाहत होते. बाळासाहेबांच्या निधनानंतरही रवी म्हात्रे हे ठाकरे कुटुंबियांसोबत होते. त्यानंतर मध्यतरीच्या काळात ते सक्रीय नव्हते. बाळासाहेबांसोबत असताना रवी म्हात्रे यांच्याकडे शाखाप्रमुखांसह, आमदार, खासदार आपल्या समस्या घेऊन रवी म्हात्रे यांच्याशी संपर्क साधायचे. त्यावेळी रवी म्हात्रे शिवसैनिकांमधील दुवा होते.

    नार्वेकरांच्या जागी रवी म्हात्रे?
    एकनाथ शिंदेंच्या बंडानंतर अनेकांनी उद्धव ठाकरेंचे स्वीय सहाय्यक मिलिंद नार्वेकरांवरही नाराजी व्यक्त केली. १९९४ पासून मिलिंद नार्वेकर शिवसैनिकांशी जोडलेले आहेत. २०१८ मध्ये शिवसेनेचे सचिव म्हणून त्यांची घोषणा करण्यात आली होती. पण, आता रवी म्हात्रेंचा उद्धव ठाकरेंजवळचा वाढलेला वावर पाहता मिलिंद नार्वेकर यांची जागा रवी म्हात्रेंनी घेतली असल्याची चर्चा आहे.