बीडच्या जरूड गावात दोन वर्षांनी भरली यात्रा; मात्र पारंपरिक प्रथा जोपासत रथ ओढतांना 14 वर्षीय मुलगा चिरडला…

कोरोनाच्या 2 वर्षानंतर भरलेल्या यात्रेत, देवाचा पारंपारिक रथ ओढताना, 14 वर्षीय चिमुरडा रथाच्या चाकाखाली चिरडल्याने जागीच ठार झाला आहे. ही धक्कादायक आणि दुर्दैवी घटना बीडच्या जरूड गावात उघडकीस आल्याने एकच खळबळ उडाली आहे.

    बीड : कोरोनाच्या 2 वर्षानंतर भरलेल्या यात्रेत, देवाचा पारंपारिक रथ ओढताना, 14 वर्षीय चिमुरडा रथाच्या चाकाखाली चिरडल्याने जागीच ठार झाला आहे. ही धक्कादायक आणि दुर्दैवी घटना बीडच्या जरूड गावात उघडकीस आल्याने एकच खळबळ उडाली आहे. परमेश्वर नागनाथ बरडे वय 14 रा. जरूड असं मृत मुलाचे नाव आहे.

    बीडपासून अवघ्या 15 किलोमीटर अंतरावर असणाऱ्या जरूड गावात, प्रतिवर्षी जागृत देवस्थान असणाऱ्या भैरवनाथाची यात्रा भरते. या यात्रेसाठी पंचक्रोशीतील गावातून हजारो भाविक भक्त यात्रेसाठी येत असतात. मात्र गत दोन वर्षापासून कोरोनाने यात्रा उत्सवावर बंदी असल्याने यात्रा भरली नाही. तर यंदा सर्वच निर्बंध शिथिल झाल्याने मोठ्या उत्साहात यात्रा भरली होती. यावेळी परंपरेने भैरवनाथाचा रथ ओढला जातो. यंदा देखील हा रथ ओढत असतांना प्रचंड गर्दी झाली होती. लहान लहान मुलांसह वृद्ध देखील रथ ओढत होते.

    दरम्यान याचवेळी परमेश्वर बरडे हा मुलगा रथ ओढत असतांना खाली पडला अन त्याच्या अंगावरून रथाचे चाक गेले. यातच त्याचा जाग्यावर मृत्यू झालाय. दरम्यान या घटनेने भाविक भक्तांसह पंचक्रोशीतील नागरिकांतून हळहळ व्यक्त केली जात आहे