उस्मानाबादमध्ये सुरु होणार वैद्यकीय महाविद्यालय, मंत्रिमंडळ बैठकीत मिळाला हिरवा कंदील

उस्मानाबाद येथे नवीन शासकीय वैद्यकीय महाविद्यालय(medical college at usmanabad) सुरु करण्यासाठी तसेच ४३० खाटांचे रुग्णालय सुरु करण्यासाठी मंत्रिमंडळ बैठकीत मंजुरी देण्यात आली आहे.

मुंबई : उस्मानाबाद येथे नवीन शासकीय वैद्यकीय महाविद्यालय(medical college at usmanabad) सुरु करण्यासाठी तसेच ४३० खाटांचे रुग्णालय सुरु करण्यासाठी मंत्रिमंडळ बैठकीत मंजुरी देण्यात आली आहे. या बैठकीच्या अध्यक्षस्थानी मुख्यमंत्री उद्धव ठाकरे होते.

या प्रस्तावित शासकीय वैद्यकीय महाविद्यालय व रुग्णालयासाठी एकूण रुपये ६७४.१४ कोटी (अनावर्ती खर्च सुमारे रूपये ४२९.६३ कोटी व आवर्ती खर्च सुमारे रूपये २४४.५१ कोटी) इतका निधी उपलब्ध करून देण्यात येईल. तसेच आवश्यक तेवढी पदनिर्मिती करण्यास आणि पदे भरण्यासदेखील मान्यता देण्यात आली आहे.

नवीन शासकीय वैद्यकीय महाविद्यालय व रुग्णालयाकरिता राष्ट्रीय आयुर्विज्ञान आयोगाच्या मानकांप्रमाणे सार्वजनिक आरोग्य विभागाच्या अखत्यारितील जिल्हा सामान्य रुग्णालय, स्त्री रुग्णालय आणि क्षय रुग्णालय स्थावर जंगम मालमत्तेसह तात्पुरत्या स्वरूपात वैद्यकीय शिक्षण व औषधी द्रव्ये विभागास निशुल्क वापरास उपलब्ध करण्यास मान्यता देण्यात  आली आहे. याशिवाय हे वैद्यकीय महाविद्यालय व संलग्नित रुग्णालय सार्वजनिक खाजगी भागिदारी (PPP) तत्वावर स्थापन करण्यास तत्वत: मान्यता देण्यात आली आहे.