शासनाच्या ‘या’ निर्णयामुळे मनोरंजन आणि चित्रपट क्षेत्राला मोठा दिलासा – सांस्कृतिक कार्यमंत्री अमित देशमुख

मुंबई : कोरोना विषाणूचा संसर्ग रोखण्यासाठी लॉकडाऊन सुरू असल्यामुळे ठप्प झालेली चित्रपटसृष्टीतील कामे पुन्हा सुरू झाली आहेत. काही अटी-शर्तींच्या अधीन राहून चित्रपट, दूरचित्रवाणी मालिका, ओटीटी

 मुंबई : कोरोना विषाणूचा संसर्ग रोखण्यासाठी लॉकडाऊन सुरू असल्यामुळे ठप्प झालेली चित्रपटसृष्टीतील कामे पुन्हा सुरू झाली आहेत. काही अटी-शर्तींच्या अधीन राहून चित्रपट, दूरचित्रवाणी मालिका, ओटीटी मालिकांच्या चित्रीकरणास राज्य शासनाने  मान्यता दिली आहे. त्यामुळे शासनाच्या या निर्णयामुळे मनोरंजन, चित्रपट क्षेत्राला मोठा दिलासा मिळाला आहे, असे सांस्कृतिक कार्यमंत्री अमित विलासराव देशमुख यांनी सांगितले.सांस्कृतिक विभागामार्फत ३० मे २०२० रोजी निर्गमित करण्यात आलेल्या मार्गदर्शक तत्वांबाबतचे स्पष्टीकरण देण्यात आले आहे. यामध्ये कोविड-१९ च्या पार्श्वभूमीवर चित्रपट, दूरचित्रवाणी मालिका, ओ टी टी यांच्या चित्रीकरणासंदर्भात राज्य शासनाने मार्गदर्शक तत्वे ३० मे २०२० रोजी जारी केलेले आहे. सदर शासन निर्णय महाराष्ट्र शासनाच्या www.maharashtra.gov.in  या संकेतस्थळावर उपलब्ध असून त्याचा सांकेतांक २०२००६२४११०९३७८२३ असा आहे.   

लॉकडाऊनपूर्वी ज्या पद्धतीने आरक्षण आणि चित्रीकरणाची परवानगी घेण्यात येत होती त्याच पद्धतीने आताही तीच पद्धत असणार आहे. चित्रपट, दूरचित्रवाणी मालिका, ओ टी टी यांना ३० मे २०२० च्या शासन निर्णयानुसार चित्रीकरणासाठी परवानगी देण्यात आली आहे. सदर चित्रीकरणाची परवानगी राज्य शासनाने तयार करून दिलेल्या एस ओ पी नुसार असेल. लॉकडाऊनपूर्वी  चित्रीकरणासाठी शासनाची परवानगी घेण्याची पद्धत यापुढेही तशीच असणार आहे.   प्रतिबंधित क्षेत्र नसलेला भाग आणि निषीद्ध क्षेत्र नसलेला भाग यामध्येच चित्रीकरणाला परवानगी आहे. केंद्र शासन व राज्य शासन यांनी लॉकडाउन बाबत दिलेल्या निर्णयाचे पालन करणे आवश्यक राहील. चित्रीकरण  करत  असताना संबंधित निर्मात्याने आवश्यक त्या परवानग्या, स्व-घोषित पत्र, चित्रीकणासंबंधित सर्व माहिती चित्रनगरीला लिखित स्वरूपात कळविणे आवश्यक आहे.

तसेच  मार्गदर्शक सूचनांचे काटेकोर पणे पालन करण्याची जबाबदारी ही पूर्णपणे संबंधित निर्मिती संस्था/ निर्माते यांची असेल. चित्रीकरणादरम्यान सुरक्षेचे व स्वच्छतेचे नियम पाळले जात आहे की नाही याची खातरजमा वेळोवेळी परवाना अधिकारी यांच्यामार्फत करण्यात येईल. राज्य शासनामार्फत जारी  करण्यात आलेल्या या मार्गदर्शक सूचना या कलाकार/ तंत्रज्ञ/ मदतनीस यांच्या सुरक्षेच्या दृष्टिकोनातून करण्यात आले आहे. थर्मल स्क्रिनिंग, स्वच्छतेची काळजी चित्रिकरणच्या  ठिकाणी असणे आवश्यक आहे. चित्रीकरणाच्या स्थळी जवळील कोविड -१९ रुग्णालये याची माहिती दूरध्वनी क्रमांक निर्मिती संस्थेला असणे आवश्यक आहे. चित्रीकरणादरम्यान कलाकार, तंत्रज्ञ सामाजिक अंतर ठेवून चित्रीकरण करू शकतात,संबंधित निर्मात्यांनी कमीत कमी मनुष्यबळात चित्रीकरण करणे आवश्यक आहे.

संबंधित निर्मात्यांनी केंद्र व राज्य शासनाचे लॉक डाउन संदर्भातील नियम पाळणे आवश्यक आहे. तसेच निर्मिती संस्थेने एक स्वतंत्र वाहन आरक्षित करून ठेवणे आवश्यक आहे, जेणे करून जर एखादा संशयित रुग्ण चित्रीकरणाठीकाणी आढळल्यास त्याला रुग्णालयात नेणे सोयीस्कर होईल.   चित्रिकरण स्टुडिओ आणि एडिटिंग कक्षात कोरोना विषाणूचा धोका टाळण्यासाठी पुरेशा उपाययोजना करणे, सर्व संबंधितांना, कर्मचाऱ्यांचे कोरोना विषाणूच्या संदर्भात प्रबोधन करून दक्षता घेण्याच्या सूचना देणे, चित्रीकरणस्थळी गर्दी टाळणे, कमीत कमी तंत्रज्ञांमध्ये  काम करणे, मोबाईलमध्ये आरोग्यसेतू ॲप इन्स्टॉल करणे, साधनसामुग्रीची हाताळणी, चित्रीकरणाच्यावेळी कोरोनाचा प्रसार रोखण्यासाठी सोशल डिस्टन्सिंगचे पालन करणे सुरक्षेच्या दृष्टिकोनातून गरजेचे आहे.