चेंबूर, गाेवंडी, देवनारमधील सोसायट्यांमध्ये लसीकरणाचा शुभारंभ; सोसायटीत घरकाम करणाऱ्या महिला, वॉचमन, ड्रायव्हर यांना दिली लस

सोसायट्यांमधील लसीकरणाला मुंबईत सुरुवात झाली आहे. चेंबूर, गोवंडी, देवनारमधील तब्बल सहा सोसायट्यांमध्ये या मोहिमेचा शुभारंभ करण्यात आला आहे. घरकाम करणाऱ्या महिला, सुरक्षारक्षक, वाहनचालक यांच्यासह हजारो रहिवाशांनी कोव्हिशिल्ड लशीचा पहिला डोस घेतला आहे. महापालिकेने सोसायट्यांमध्ये लसीकरणाला परवानगी दिली आहे. संबंधित सोसायटीने खासगी रुग्णालयांशी संवाद साधून (टाय अप) हे लसीकरण करून घेण्यासाठी ही परवानगी देण्यात आली आहे.

    मुंबई : सोसायट्यांमधील लसीकरणाला मुंबईत सुरुवात झाली आहे. चेंबूर, गोवंडी, देवनारमधील तब्बल सहा सोसायट्यांमध्ये या मोहिमेचा शुभारंभ करण्यात आला आहे. घरकाम करणाऱ्या महिला, सुरक्षारक्षक, वाहनचालक यांच्यासह हजारो रहिवाशांनी कोव्हिशिल्ड लशीचा पहिला डोस घेतला आहे. महापालिकेने सोसायट्यांमध्ये लसीकरणाला परवानगी दिली आहे. संबंधित सोसायटीने खासगी रुग्णालयांशी संवाद साधून (टाय अप) हे लसीकरण करून घेण्यासाठी ही परवानगी देण्यात आली आहे.

    लसीकरणाचे शुल्क संबंधित सोसायटी आणि रुग्णालयाने आपसात ठरवलेले असेल. त्याच्याशी पालिकेचा संबंध राहाणार नाही, असे पालिकेने आधीच स्पष्ट केले आहे. दरम्यान, ईशान्य मुंबईतील देवनार, गोवंडी परिसरातील रहेजा एक्रोपॉलिस, रहेजा फेज-२, निळकंठ गार्डन्स तसेच चेंबूर येथील बसंत पार्क, आरबीआय वसाहत, सफल ट्विन टॉवर या सोसायट्यांमध्ये लसीकरणाला सुरुवात करण्यात आली आहे.

    रहेजा एक्रोपॉलिस सोसायटीतील लसीकरणाचा शुभारंभ शिवसेनेचे खासदार राहुल शेवाळे यांच्या हस्ते करण्यात आले. सध्या खासगी रुग्णालयांमार्फत सोसायट्यांमध्ये सशुल्क लसीकरण केले जात असले, तरी मुंबई महापालिकेला जागतिक निविदेत मोठ्या प्रमाणात लशी मिळाल्यानंतर सोसायट्यांमध्ये मोफत लसीकरणासाठी आपला आग्रह राहणार आहे, अशी माहिती शेवाळे यांनी दिली आहे.