कोरोना केंद्रासाठी पालिकेचा शाळांचा आधार; शाळेत उभारले सुसज्ज कोव्हीड सेंटर

मुंबईतील करोनाची स्थिती लक्षात घेउन करोना रुग्णांवरील उपचारांसाठी पालिका, सरकारी, खासगी स्तरावर प्रयत्न सुरू आहेत. जम्बो करोना केंद्र, रुग्णालयांपाठोपाठ करोना केंद्र म्हणून आता पालिकेच्या शाळांचाही आधार घेतला जात आहे. त्याची सुरुवात म्हणून मुंबई सेंट्रलमधील ताडदेव परिसरातील पालिका शाळेत करोना रुग्णांसाठी १०० खाटा, ऑक्सिजन पुरवठ्यासह विविध अत्याधुनिक सुविधांनी सज्ज केंद्र उभारले गेले आहे. १ मे महाराष्ट्र दिनाच्या निमित्ताने पालिका आणि समाजसेवी संस्था, ट्रस्ट, मंडळांच्या सहाय्याने सुरू झालेले केंद्र कार्यरत झाले आहे.

    मुंबई : मुंबईतील करोनाची स्थिती लक्षात घेउन करोना रुग्णांवरील उपचारांसाठी पालिका, सरकारी, खासगी स्तरावर प्रयत्न सुरू आहेत. जम्बो करोना केंद्र, रुग्णालयांपाठोपाठ करोना केंद्र म्हणून आता पालिकेच्या शाळांचाही आधार घेतला जात आहे. त्याची सुरुवात म्हणून मुंबई सेंट्रलमधील ताडदेव परिसरातील पालिका शाळेत करोना रुग्णांसाठी १०० खाटा, ऑक्सिजन पुरवठ्यासह विविध अत्याधुनिक सुविधांनी सज्ज केंद्र उभारले गेले आहे. १ मे महाराष्ट्र दिनाच्या निमित्ताने पालिका आणि समाजसेवी संस्था, ट्रस्ट, मंडळांच्या सहाय्याने सुरू झालेले केंद्र कार्यरत झाले आहे.

    ताडदेवमधील म्युनिसिपल शाळा, बने कंपाउंडमध्ये नवीन केंद्र सुरू झाले असून तिथे एक्सरेसह इतर सर्व व्यवस्था केली आहे. तीन मजली शाळेत रुग्णांना आवश्यक त्या सुविधा मिळतील, याची काळजी घेतली जात आहे. ऑक्सिजनच्या पुरवठ्यासह एक्सरे, वाफ घेण्यासाठी सुविधेचाही समावेश आहे. रुग्णांना आंघोळ करण्यासाठी गरम पाण्याची व्यवस्थादेखील केली आहे. त्यासह प्रशिक्षित डॉक्टर, नर्स आदींची नियुक्ती केली आहे. रुग्णांची जेवणाची आबाळ होउ नये म्हणूनही तशी तजवीज केली आहे. तसेच, इथे सेवा बजाविणाऱ्या डॉक्टर, नर्स, कर्मचाऱ्यांसाठीही उत्तम व्यवस्था केली आहे.

    गेल्या काही दिवसांपासून शहरात करोनाचा वाढलेला कहर पाहून अतिरिक्त करोना केंद्रांची निकड निर्माण झाली आहे. भविष्यकालीन तरतूद म्हणून ही करोना केंद्र उपयुक्त ठरणार आहेत. सध्याचे उन आणि आगामी पावसाळा पाहता पालिका शाळेतील विलगीकरण कक्ष रुग्णांसाठी फायदेशीर ठरणार आहे. परिसरातील छोट्या घरांत राहणाऱ्या रुग्णांसाठी विलगीकरणाची समस्या निर्माण होते. त्यांच्यासाठी हे केंद्राचा फायदा होणार असल्याचे स्थानिकांचे म्हणणे आहे.

    ताडदेव येथे पालिकेच्या बने कंपाउंड शाळेचा उपयोग करोना केंद्रासाठी केला आहे. जीवन ज्योत ड्रग बँक या स्वयंसेवी संस्थेच्या सहाय्याने ताडेदव सार्वजनिक गणेशोत्सव मंडळाच्या पुढाकाराने केंद्र उभे राहिले आहे. त्यासाठी विविध सामाजिक संस्था, दानशूर व्यक्तींनी सक्रिय सहभाग घेतला आहे. त्याआधारे अल्पावधीतच केंद्र सेवेत आले असून त्यामुळे इतर केंद्रांवरील ताणदेखील कमी होण्यास मदत होणार आहे. त्यासाठी पालिकेसोबत ताडदेव सार्वजनिक गणेशोत्सव मंडळाने व्यवस्थापनाची जबाबदारी स्वीकारली आहे.