मोनोच्या कामांना नो-नो

मेट्रो -४ हा संपूर्ण उन्नत मेट्रो प्रकल्प असून, याचा एकूण प्रकल्प खर्च १४,५४९ कोटी इतका आहे. मोनो गाड्यांची अनुपलब्धता, परिणामी २५-३० मिनिटांनी धावणारी गाडी, यामुळे मोनोरेल प्रवाशांच्या पसंतीस उतरलेली नाही. प्रवासी प्रतिसाद वाढवण्यासाठी वडाळा मोनो स्थानकाला 'वडाळा-कासारवडवली' या मेट्रो ४ मार्गाची जोडणी देण्यात येईल. फेऱ्यांची संख्या वाढवण्यासाठी नव्या गाड्या खरेदी करण्याचे नियोजन आहे. मात्र, सद्यस्थितीत मेट्रो, एमटीएचएल असे खर्चिक प्रकल्प सुरू असल्याने मोनो गाड्या खरेदीला प्राथमिकता नसल्याचे 'एमएमआरडी'ने सांगितले आहे.

    मुंबई : मुंबईची वाढती लोकसंख्या लक्षात घेता, मुंबईकरांच्या प्रवास अधिक सुखकर आणि जलद होण्यासाठी मेट्रोच्या धरतीवर मोनो रेल आणली गेली. परंतू मुंबईतील मेट्रो आणि रेल्वेच्या तुलनेत मोनोला मुंबईकरांनी पसंती दिली नाही, फारसा प्रतिसाद न दिल्यामुळं मोनोचा खर्च अधिक आणि उत्पन्न कमी अशी स्थिती मोनो रेलची झाली आहे. लोकांनी मोनोकडे पाठ फिरवल्याने मोनोचे पुढील काम लांबणीवर पडले आहे. अफाट खर्च आणि कमी प्रवासी यामुळे ‘पांढरा हत्ती’ अशी ओळख बनलेल्या मोनोरेलला नवसंजीवनी देण्याचा निर्णय मुंबई महानगर प्रदेश विकास प्राधिकरण अर्थात एमएमआरडीएने घेतला. मात्र, मेट्रो-३ कारशेडचा पेच आणि मेट्रोची वाढलेली कालमर्यादा यामुळे मोनोला मिळणारी नवसंजीवनीही लांबणीवर पडणार आहे. मोनोरेलच्या दोन्ही दिशेला म्हणजेच मेट्रो २ बी (डी.एन.नगर ते मंडाळे) चेंबूर आणि मेट्रो ४ (वडाळा ते कासारवडवली) वडाळा येथे जोडणार आहे. पण येथील काम लांबणीवर पडले असल्याचे एमएमआरडीएने सांगितले आहे.

    सिंगापूरच्या धर्तीवर २०१४ मध्ये चेंबूर ते संत गाडगे महाराज चौक (सातरस्ता) या मार्गावर देशातील पहिली मोनोरेल मुंबईत धावू लागली. वडाळा मोनो स्थानकात डेपोही आहे. मात्र गाड्यांअभावी हा प्रकल्प ‘एमएमआरडीए’साठी डोकेदुखीचा ठरला आहे. सध्या मोनोरेल उत्पन्नापेक्षा त्याचा देखभाल-दुरुस्ती खर्चाचा आकडा कोटींचा आहे. सध्या घोडबंदर रोड ठाणे परिसरात या मेट्रोचे खांब उभारणीचे काम वेगाने पूर्ण होत आहे. मात्र, कारशेडसाठी भराव, निविदा, प्रत्यक्ष काम अशी प्राथमिक सुरुवातही झालेली नाही. परिणामी या मेट्रो प्रकल्पात मोठी वाढ होण्याची शक्यता आहेच. शिवाय याचा परिणाम मोनो-मेट्रो जोडणीवरही होईल, अशी भीती अधिकाऱ्यांकडून व्यक्त करण्यात येत आहे. प्रस्तावित कांजुरमार्ग कारशेड येथे मेट्रो ६, ४ आणि १४ जोडण्यात येणार असल्याची माहिती पर्यावरणमंत्री आदित्य ठाकरे यांनी दिली होती. मात्र, तूर्त कायमस्वरूपी कारशेडची जागा निश्चिती झालेली नाही. याचा मोठा परिणाम या तिन्ही मेट्रो मार्गांवर होणार आहे.

    मेट्रो -४ हा संपूर्ण उन्नत मेट्रो प्रकल्प असून, याचा एकूण प्रकल्प खर्च १४,५४९ कोटी इतका आहे. मोनो गाड्यांची अनुपलब्धता, परिणामी २५-३० मिनिटांनी धावणारी गाडी, यामुळे मोनोरेल प्रवाशांच्या पसंतीस उतरलेली नाही. प्रवासी प्रतिसाद वाढवण्यासाठी वडाळा मोनो स्थानकाला ‘वडाळा-कासारवडवली’ या मेट्रो ४ मार्गाची जोडणी देण्यात येईल. फेऱ्यांची संख्या वाढवण्यासाठी नव्या गाड्या खरेदी करण्याचे नियोजन आहे. मात्र, सद्यस्थितीत मेट्रो, एमटीएचएल असे खर्चिक प्रकल्प सुरू असल्याने मोनो गाड्या खरेदीला प्राथमिकता नसल्याचे ‘एमएमआरडी’ने सांगितले आहे.