गिरीश चौधरी यांच्या कोठडीत एक दिवसाची वाढ; तीन दिवसांची कोठडी देण्यास न्यायालयाचा नकार

भोसरी येथील जमीन गैरव्यवहारप्रकरणी अटक करण्यात आलेले राष्ट्रवादी काँग्रेसचे नेते एकनाथ खडसे यांचे जावई गिरीश चौधरी यांच्या ईडी कोठडीत मुंबई सत्र न्यायालयातील पीएमएलए न्यायालयाने एक दिवसाची वाढ केली. एकनाथ खडसे यांच्या पत्नी मंदाकिनी खडसे आणि जावई गिरीश चौधरी यांनी ...

    मुंबई (Mumbai). भोसरी येथील जमीन गैरव्यवहारप्रकरणी अटक करण्यात आलेले राष्ट्रवादी काँग्रेसचे नेते एकनाथ खडसे यांचे जावई गिरीश चौधरी यांच्या ईडी कोठडीत मुंबई सत्र न्यायालयातील पीएमएलए न्यायालयाने एक दिवसाची वाढ केली. एकनाथ खडसे यांच्या पत्नी मंदाकिनी खडसे आणि जावई गिरीश चौधरी यांनी २८ एप्रिल २०१६ रोजी भोसरी येथील एमआयडीसी येथील सव्‍‌र्हे क्र. ५२/२ अ ही जमीन अब्बास रसुलभाई उकानी नामक मूळ जमीन मालकाकडून ३.७५ कोटी रुपयांना खरेदी केली.

    नोंदणी निबंधकांच्या कार्यालयात या व्यवहाराची रीतसर नोंद करत एमआयडीसीच्या ताब्यात असलेल्या आणि त्यांच्या मालकीच्या जमिनीचे खडसे कुटुंबीय सरकारी कागदोपत्री मालक झाले. या सर्व व्यवहारात सुमारे ६१ कोटी रुपयांच्या महसुलाचे नुकसान झाल्याचे प्रथमदर्शनी दिसून आले.

    हा मोठा गैरव्यवहार असल्याचा ‘ईडी’ला संशय आहे. या प्रकरणी नाव समोर आल्यानंतर गिरीश चौधरी यांना सक्तवसुली संचलनालयाकडून (ईडी) चौकशीसाठी बोलावण्यात आले आणि रात्री उशीरापर्यंत त्यांची चौकशी केल्यानंतर अटक करण्यात आली. त्यांना न्यायालयाने १९ जुलैपर्यंत कोठडी सुनावली होती. सोमवारी कोठडी संपत असल्याने चौधरी यांना मुंबई सत्र न्यायालयातील पीएमएलए न्यायालयात हजर करण्यात आले.

    तेव्हा, मनी लॉड्रिंग प्रकरणात तपास अद्याप पूर्ण झाला नसून अधिक चौकशी करण्यासाठी चौधरी यांना तीन दिवसांची कोठडी वाढवून देण्यात यावी, अशी मागणी ईडीच्यावतीने करण्यात आली. मात्र, त्यांची मागणी अमान्य करत न्यायालयाने चौधरी यांच्या कोठडीत २० जुलैपर्यंत एक दिवसाची वाढ केली.