मनोज ठवकर मृत्यू प्रकरण: राजकीय दबावानंतर पोलिस उपनिरीक्षकावर निलंबनाची कारवाई; तपास ‘सीआयडी’कडे

नागपुरात पोलिसांच्या मारहाणीत मनोज ठवकर (Manoj Thawkar) या तरुणाचा मृत्यू झाल्या प्रकरणी पीएसआयसह (PSI) तीन पोलीस कर्मचाऱ्यांना निलंबित करण्यात आलं आहे. नागपूरचे पोलीस आयुक्त (Nagpur Police Commissioner) अमितेश कुमार (Amitesh Kumar) यांनी मारहाण प्रकरणाची गंभीर दखल घेतली आहे.

    नागपूर (Nagpur).  पोलिसांच्या मारहाणीत मनोज ठवकर (Manoj Thawkar) या तरुणाचा मृत्यू झाल्या प्रकरणी पीएसआयसह (PSI) तीन पोलीस कर्मचाऱ्यांना निलंबित करण्यात आलं आहे. नागपूरचे पोलीस आयुक्त (Nagpur Police Commissioner) अमितेश कुमार (Amitesh Kumar) यांनी मारहाण प्रकरणाची गंभीर दखल घेतली आहे. विरोधी पक्ष नेते (Opposition leader) देवेंद्र फडणवीस (Devendra Fadnavis) आणि केंद्रीय मंत्री नितीन गडकरी (Union Minister Nitin Gadkari) यांनीही मनोज ठवकर मृत्यू प्रकरणी आरोपी पोलिसांवर कारवाई करण्याची मागणी केली होती.

    नागपूर शहरातील पारडी पोलीस स्टेशन हद्दीत सात जुलैच्या रात्री ही घटना घडली होती. आधी तिघा पोलिसांची तडकाफडकी नियंत्रण कक्षात बदली करण्यात आली होती. मात्र आता पोलीस उपनिरीक्षक मुकेश ढोबळे, नायक नामदेव चरडे, आकाश शहाणे यांच्यावर निलंबनाची कारवाई करण्यात आली आहे. मास्क न घातल्यामुळे तीन पोलिसांनी मनोज ठवकरला मारहाण केल्याचा आरोप आहे. मनोज ठवकर मृत्यू प्रकरणाचा तपास सीआयडीकडून सुरु आहे. भाजप आमदार कृष्णा खोपडे यांनी मुख्यमंत्री उद्धव ठाकरे यांना भेटून कारवाईची मागणी केली होती.

    काय आहे प्रकरण?
    35 वर्षीय मनोज ठवकर हा दिव्यांग होता. मेकॅनिक म्हणून तो नागपुरात काम करत होता. नागपूर शहरातील पारडी चौक हनुमान मंदिर परिसरात सात जुलैच्या रात्री पोलिसांची नाकाबंदी सुरु होती. रात्री साडेआठ-नऊ वाजताच्या सुमारास मनोज या मार्गाने घरी चालला होता. मनोजची दुचाकीही थांबवण्यात आली, मात्र वेळीच ब्रेक न लागल्याने त्याची दुचाकी पोलीस वाहनावर धडकली.

    पोलिसांच्या मारहाणीनंतर बेशुद्ध
    मनोजने मुद्दाम धडक मारल्याचा पोलिसांचा समज झाला, असा दावा केला जातो. त्यानंतर पोलिस उपनिरीक्षक मुकेश ढोबळे याच्यासह तिघा पोलीस कर्मचाऱ्यांनी मनोज ठवकरला मारहाण केल्याचा आरोप आहे. त्यानंतर त्याला पोलीस स्टेशनमध्येही नेण्यात आले. मात्र शुद्ध हरपलेल्या मनोज ठवकरला नागपुरातील भवानी मल्टिस्पेशालिटी अँड रिसर्च सेंटरमध्ये दाखल करण्याआधीच मृत घोषित करण्यात आलं होतं.

    हॉस्पिटलबाहेर मोठा जमाव
    पोलिसांच्या मारहाणीत मनोजचा मृत्यू झाल्याचा आरोप नातेवाईकांनी केला. त्यानंतर रुग्णालय परिसरात त्याच्या नातेवाईकांनी पोलिसांविरोधात घोषणाबाजी केली. मनोजच्या पश्चात पत्नी आणि दोन मुलं असा परिवार आहे. त्याच्या कुटुंबीयांना वीस लाख रुपयांची नुकसान भरपाई, पत्नीला सरकारी नोकरी आणि दोषी पोलिस अधिकाऱ्यांवर खटला चालवण्याची मागणी जमावाने केली होती. शेकडोंचा जमाव रस्त्यावर उतरल्यानंतर रात्री उशिरापर्यंत हॉस्पिटल परिसरात तणाव होता.