onion export

कांद्याच्या उत्पादन खर्चाचे गणित विचारात घेता प्रतिकिलो उत्पादनासाठी किमान 20 रुपयांचा खर्च आहे. याशिवाय वर्षभरात अवकाळी पावसासारख्या संकटांचा बसणारा तडाखा, सरकारची उफराटी धोरणे आदी बाबींची झळ थेट उत्पादकांना पोहोचत आहे. उत्पादन खर्चापेक्षा कमी दरात कांदा विक्री करण्याची वेळ आल्याने उत्पादक नाराज आहेत. कांद्यास प्रतिकिलो किमान तीस रुपये भाव देण्यात यावा, अशी बहुतांश कांदा उत्पादकांची भूमिका आहे.

    नाशिक : बाजार समित्यांमध्ये लाल कांद्यासोबतच उन्हाळी कांद्याच्या वाढलेल्या आवकेमुळे कांद्याचे दर गेल्या दहा दिवसांत चांगलेच घसरले आहेत. अवघ्या दोन आठवड्यांत या दरात घसरण होऊन पंधरवड्यापूर्वी अडीच हजारांच्या आसपास असणारा कांदा आता 1200 रुपयांपर्यंत घसरला आहे. यातही थोड्या कमी प्रतवारीच्या कांद्याची घसरण आता हजार रुपयांच्याही खाली आली आहे. उत्पादन खर्च आणि विक्रीतून होणाऱ्या नफ्याचा ताळमेळच बसत नसल्याने द्राक्ष उत्पादक चिंतेत आहे. या स्थितीत कांदा निर्यातीसारख्या योजनांमध्ये उत्पादकांना अनुदान देऊन दिलासा द्यावा, अशी मागणी उत्पादकांकडून पुढे येत आहे.

    कांद्याच्या उत्पादन खर्चाचे गणित विचारात घेता प्रतिकिलो उत्पादनासाठी किमान 20 रुपयांचा खर्च आहे. याशिवाय वर्षभरात अवकाळी पावसासारख्या संकटांचा बसणारा तडाखा, सरकारची उफराटी धोरणे आदी बाबींची झळ थेट उत्पादकांना पोहोचत आहे. उत्पादन खर्चापेक्षा कमी दरात कांदा विक्री करण्याची वेळ आल्याने उत्पादक नाराज आहेत. कांद्यास प्रतिकिलो किमान तीस रुपये भाव देण्यात यावा, अशी बहुतांश कांदा उत्पादकांची भूमिका आहे.

    गेल्या वर्षी शेतकऱ्यांना कांद्याचे बियाणेही अवाच्या सव्वा दराने खरेदी करावे लागले आहेत. एकीकडे सर्वत्र वाढणाऱ्या महागाईचाही फटका कांद्यास बसतो आहे. देशात बहुतांश ठिकाणी पोहोचविला जाणारा कांदा महाराष्ट्रातील आहे.

    गेल्या वर्षीपर्यंत महाराष्ट्रासह गुजरात आणि मध्य प्रदेश येथून नाफेडकडून कांदा खरेदी केला जात होता. यंदा यामध्ये आणखी चार राज्यांची भर पडली असून, आता एकूण सात राज्यांकडून कांदा खरेदी होणार आहे. नाफेडसारख्या संस्थांनीही कांदा खरेदी करताना शेतकऱ्यांना किमान उत्पादन खर्च निघेल इतका तरी रास्त भाव द्यावा, अशी मागणी कांदा उत्पादकांनी केली आहे.

    दरम्यान, लासलगाव बाजार समितीमध्ये शुक्रवारी उन्हाळ कांद्याची आवक 650 क्विंटल, तर लाल कांद्याची आवक 13,200 क्विंटल झाली. उन्हाळ कांद्यास सरासरी 1400 रुपये, तर लाल कांद्यास सरासरी 1251 रुपये भाव मिळाला होता.

    बाजार समितीत उन्हाळ कांदा हजार रुपयांपर्यंत, तर लाल कांदा 900 रुपयांपर्यंत खाली आला. देशात राजस्थान, कोलकाता, मध्य प्रदेश, गुजरात आदी राज्यांमध्ये स्थानिक कांद्याची आवक सुरू झाली आहे, तर दुसरीकडे महाराष्ट्रातही बाजार समित्यांमध्ये आवकेचा आलेख वाढला आहे. परिणामी, कांद्याच्या राज्यांतर्गत मागणीवरही परिणाम दिसून येत आहे.