लोकजनशक्ती पार्टीच्या अध्यक्षपदावरून चिराग पासवान यांची हकालपट्टी !

सूरजभान यांना चिराग पासवान यांच्या जागी कार्यकारी अध्यक्ष म्हणून नियुक्त करण्यात आलेले आहे. सूरजभान हे पक्षाच्या नव्या अध्यक्षाची निवड प्रक्रिया संपन्न करतील. राष्ट्रीय कार्यकारणीची पाच दिवसांच्या आत बैठक बोलावून नव्या अध्यक्षाची निवड केली जाणार आहे. 

    पटना – बिहारमधील सध्या लोकजनशक्ती पार्टीचे अध्यक्ष चिराग पासवान यांच्याविरोधात पक्षाच्या सहापैकी पाच खासदारांनी बंड करून, त्यांचे काका पशूपती कुमार पारस यांची नेतेपदी निवड केली असून, आता लोकजनशक्ती पार्टीच्या अध्यक्षपदावरूनही चिराग पासवान यांना हटववण्यात आले आहे. त्यामुळे या घडामोडी चिराग पासवानसाठी अतिशय धक्कादायक ठरत आहेत.

    सूरजभान यांना चिराग पासवान यांच्या जागी कार्यकारी अध्यक्ष म्हणून नियुक्त करण्यात आलेले आहे. सूरजभान हे पक्षाच्या नव्या अध्यक्षाची निवड प्रक्रिया संपन्न करतील. राष्ट्रीय कार्यकारणीची पाच दिवसांच्या आत बैठक बोलावून नव्या अध्यक्षाची निवड केली जाणार आहे.

    लोकजनशक्ती पक्षाच्या (एलजीपी) बंडखोर खासदारांनी नेतेपदी निवड केलेले पशूपतीकुमार पारस हे पक्षनेते चिराग पासवान यांचे वडील आणि लोकजनशक्ती पक्षाचे संस्थापक रामविलास पासवान यांचे धाकटे बंधू आहेत. तर, या सर्व धक्कादायक घडामोडींच्या पार्श्वभूमीवर चिराग पासवान यांनी ट्विट करून आपल्या भावना व्यक्त केल्या आहेत. या ट्विटसोबत त्यांनी एक जुने पत्र देखील जोडलेले आहे.