संजय राऊतांच्या प्रकृतीत होतीये सुधारणा; सोमवारपासून पुन्हा साधणार माध्यमांशी संवाद

काही महिने विश्रांती घेऊन नव्या वर्षात पुन्हा सार्वजनिक जीवनात येणार असल्याचे सांगितले होते. राऊत यांची अनुपस्थिती स्थानिक स्वराज्य संस्थांच्या निवडणुकीच्या पार्श्वभूमीवर, शिवसेना सदस्यांमध्ये चर्चेचा विषय बनत होती.

मुंबई : गेल्या काही काळापासून तब्येतीच्या कारणास्तव सार्वजनिक जीवनापासून दूर राहिलेले राज्यसभा खासदार आणि शिवसेना उद्धव बाळासाहेब ठाकरे पक्षाचे प्रवक्ते संजय राऊत लवकरच राजकारणात परतणार आहेत. ठाकरे गटाची तोफ अशी ओळख असलेले संजय राऊत जवळजवळ महिनाभरापासून पक्षाच्या कार्यक्रमांमध्ये, बैठकांमध्ये आणि पत्रकार परिषदांमध्ये अनुपस्थित असल्याचे दिसून आले आहे. मात्र, आता ते लवकरच सक्रीय राजकारणात दिसून येणार आहेत.

डॉक्टरांच्या सल्ल्यानुसार, काही महिने विश्रांती घेऊन नव्या वर्षात पुन्हा सार्वजनिक जीवनात येणार असल्याचे सांगितले होते. राऊत यांची अनुपस्थिती, विशेषतः स्थानिक स्वराज्य संस्थांच्या निवडणुकीच्या पार्श्वभूमीवर, शिवसेना सदस्यांमध्ये चर्चेचा विषय बनत होती. काही दिवसांपूर्वीच माजी मुख्यमंत्री उद्धव ठाकरे यांनी संजय राऊत यांची त्यांच्या घरी भेट घेतली. आता, संजय राऊत यांची प्रकृती झपाट्याने सुधारत असल्याची बातमी समोर आली आहे आणि ते एका महिन्याच्या आत राजकीय मैदानात परतण्याची अपेक्षा आहे. ते पुढील आठवड्यात सोमवारी सकाळी १० वाजता माध्यमांशी संवाद साधतील, अशी माहिती सध्या दिली जात आहे.

हेदेखील वाचा : Sanjay Raut on Bihar Election: ‘१० हजारात लोकशाही विकली जाते…’; बिहारच्या निकालावर संजय राऊतांनी तोफ डागली

आक्रमक भाषा आणि स्पष्टवक्तेपणासाठी प्रसिद्ध असलेले संजय राऊत यांचे पुनरागमन अशावेळी झाले आहे, ज्यावेळी राज्यात अनेक महत्त्वाच्या राजकीय मुद्द्यांवर चर्चा सुरू आहे. सोमवारी सकाळी पत्रकार परिषदेत राऊत या ज्वलंत मुद्द्यांवर काय भाष्य करतात हे पाहणे महत्त्वाचे ठरेल. त्यांच्या परतण्यामुळे ठाकरे गटाच्या कार्यकर्त्यांमध्ये नवीन उत्साह निर्माण होण्याची अपेक्षा आहे. लोक पुढील मुद्द्यांवर राऊत यांच्याकडून प्रतिसादाची अपेक्षा करत आहेत.

संजय राऊत यांच्या ट्विटने राजकारण तापले

राज्यात सध्या स्थानिक स्वराज्य संस्थांच्या निवडणुका जाहीर झाल्या आहेत. 2 डिसेंबरला मतदान आणि 3 डिसेंबरला निकाल जाहीर होणार आहे. दरम्यान गेल्या काही महिन्यांमध्ये राज्याच्या राजकरणात वेगळेच चित्र दिसून आले आहे. गेली अनेक वर्षे एकमेकांपासून दूर असलेले ठाकरे बंधु एकत्रित आले आहेत. दरम्यान मनसेला महाविकास आघाडीत घ्यायचे की नाही यावर मतभेद दिसून येत आहेत.  यातच आता संजय राऊत यांनी केलेल्या ट्वीटने राजकारण तापले आहे.

हेदेखील वाचा : Maharashtra Politics: “…परवानगीची गरज नाही”; मनसेमुळे ‘मविआ’ फुटणार? राऊतांच्या पोस्टने खळबळ