३५ रुग्णांची १४ दिवसानंतरही चाचणी पॉझिटिव्ह

‘पूर्वी १४ दिवसांनंतर चाचण्या झाल्या की डिस्चार्ज केले जात होते पुणे : करोनाचा संसर्ग झालेल्या रुग्णांना १४ दिवसांनंतर चाचणी निगेटिव्ह आल्यास घरी पाठविले जाते. परंतु, आतापर्यंत बरे

‘पूर्वी १४ दिवसांनंतर चाचण्या झाल्या की डिस्चार्ज केले जात होते

 पुणे :
करोनाचा संसर्ग झालेल्या रुग्णांना १४ दिवसांनंतर चाचणी निगेटिव्ह आल्यास घरी पाठविले जाते. परंतु, आतापर्यंत बरे झालेल्या रुग्णांपैकी ३५ रुग्णांची १४ दिवसानंतरही चाचणी पॉझिटिव्ह आल्याने संसर्गाचा धोका कायम असल्याचे आढळून आले. विषाणूचा प्रादुर्भाव असल्याचे लक्षात येताच त्या रुग्णांना आणखी सात दिवस आयसोलेशन वॉर्डात ठेवण्यात आल्यानंतर एकविसाव्या दिवशी त्यांची चाचणी निगेटिव्ह आली. त्यानंतर रुग्णांना घरी सोडण्यात आले.



‘शहरात साडेतीन हजार रुग्णांची नोंद झाली. त्या दरम्यन पुण्यातील काही भागातील रुग्ण लागण झाल्याने नायडू रुग्णालयात उपचार घेत होते. त्यावेळी केंद्र सरकारच्या धोरणानुसार १४ दिवसानंतर डिस्चार्ज करण्यात येत होते. साधारण १२ मे पूर्वी रुग्णालयातील ३५ जणांचा कालावधी संपुष्टात येत असल्याने १४ व्या दिवशी चाचणी घेण्यात आली. ती पॉझिटिव्ह आली. पुन्हा दुसऱ्या दिवशी चाचणी घेतली असता ती सुद्धा पॉझिटिव्ह आली. त्यामुळे करोनाच्या विषाणूचा त्या रुग्णांच्या शरिरात अद्याप प्रादुर्भाव असल्याचे दिसून आले. त्यामुळे आणखी सात दिवस त्या ३५ रुग्णांना आयसोलेशन वॉर्डात ठेवण्यात आले. त्यानंतर २१ व्य दिवशी चाचणी केली असता निगेटिव्ह आली. त्यानंतर आम्ही त्यांना डिस्चार्ज केले,’ अशी माहिती नायडू रुग्णालयाचे प्रमुख आणि सहायक आरोग्य प्रमुख डॉ. संजीव वावरे यांनी दिली.

ससून रुग्णालयाच्या सूक्ष्मजीव शास्त्रज्ञ डॉ. सुवर्णा जोशी यांनी करोनाचा आजार पुन्हा उलटण्याची शक्यता फेटाळून लावली. ‘पूर्वी १४ दिवसांनंतर चाचण्या झाल्या की डिस्चार्ज केले जात होते. आता त्या धोरणात बदल केला आहे. दहाव्या दिवशी चाचणी न करता डिस्चार्ज करा असे सरकारने सांगितले. म्हणजेच सातव्या दिवसापासून त्या व्यक्तीला लक्षणे नसल्यास त्याची चाचणी करण्याची गरज नाही असे मार्गदर्शक सूचनांमध्ये म्हटले आहे. त्या ३५ जणांमध्ये रोग प्रतिकारशक्ती चांगली नसावी. त्यामुळे १४ दिवसांपर्यंत त्यांच्या शरिरातील विषाणू बाहेर पडू शकला नाही. त्याला कालावधी अधिक लागला ही बाब दुर्मिळ असली तरी फार गंभीर नाही. रुग्णांचे बरे होण्याचे प्रमाण अधिक होत असताना त्यापैकी एक टक्क्यांपेक्षा ही कमी एवढे प्रमाण या प्रकाराचे असू शकते,’ याकडे डॉ. सुवर्णा जोशी यांनी लक्ष वेधले.