रायरेश्वर, रोहिडेश्वर किल्ल्यांवर पर्यटनाला बंदी; भोर प्रशासनाचा निर्णय

    भोर/रुपेश जाधव : तालुक्यातील रायरेश्वर, रोहिडेश्वर या किल्ल्यांवर पर्यटकांना बंदी करण्याचा निर्णय तालुका प्रशासनाने घेतला असल्याचे तहसीलदार अजित पाटील यांनी सांगितले.

    सध्या तालुक्यात पडलेल्या पावसाने डोंगररांगावर चढलेला हिरवळीचा साज व धुकट असे वातावरण यामुळे भोर व परिसरात पर्यटकांचा लोट येऊ लागला आहे. तोरणा किल्ल्यावर पर्यटकांनी केलेल्या उपद्रवामुळे वेल्हे तालुका प्रशासनाने राजगड व तोरणा किल्ल्यावर पर्यटकांना बंदी केली आहे. त्यामुळे पर्यटकांनी आपला मोर्चा भोर तालुक्यातील रायरेश्वर रोहिडेश्वर भाटघर धरण, नीरा-देवघर धरण, महाड-रोड वरांधा घाट, मांढरदेव घाट कडे वळविला आहे.

    काही मध्यपी पर्यटक किल्ल्याचा पायथा रोड, टेकडी, धरणाचा बॅकवॉटर परीसरात मोकळ्या जागेत बसून मद्यपान करतात. अशा पर्यटकांचा त्रास स्थानिकांना होऊ नये त्यासाठी काही काळासाठी तालुक्यांतील गड- किल्ल्यांवर पर्यटनास बंदी करण्याचा निर्णय घेतला असून याबाबतचे आदेश काढण्यात येणार असून पोलीस व स्थानिक ग्रामपंचायत ला देण्यात येणार असल्याचे तहसीलदार अजित पाटील यांनी सांगितले.