मद्यधुंद वाहन चालकाने दिलेल्या धडकेत चार्टर्ड अकाऊटंटचा मृत्यू

या अपघातात गंभीर जखमी झालेल्या अंकुर खंडेलवाल यांना जवळच्या रुग्णालयात दाखल करण्यात आले होते. त्यानंतर उपचार सुरू असताना त्यांचा मृत्यू झाला. अपघाताची माहिती मिळाल्यानंतर चंदननगर पोलिसांनी घटनास्थळी धाव घेत चालक जोविमसन जेम्स याला अटक केली. मद्यधुंद अवस्थेत तो कार चालवत असल्याचे निष्पन्न झाले होते.

    पुणे: पुण्याच्या चंदननगर परिसरात एका मद्यधुंद चालकाच्या भरधाव वाहनाने दिलेल्या धडकेत चार्टर्ड अकाऊटंटचा मृत्यू झाल्याची घटना घडली आहे. अंकुर खंडेलवाल (वय ३८) असे मृत्युमुखी पडलेल्या तरुणाचे नाव आहे. चंदननगर पोलिसांनी या प्रकरणी कार चालक जोविमसन जेम्स (वय ३०)याला अटक केली होती. मात्र त्यानंतर कोर्टातून त्याला एका दिवसात जामीन मिळाला आहे.

    या अपघातात गंभीर जखमी झालेल्या अंकुर खंडेलवाल यांना जवळच्या रुग्णालयात दाखल करण्यात आले होते. त्यानंतर उपचार सुरू असताना त्यांचा मृत्यू झाला. अपघाताची माहिती मिळाल्यानंतर चंदननगर पोलिसांनी घटनास्थळी धाव घेत चालक जोविमसन जेम्स याला अटक केली. मद्यधुंद अवस्थेत तो कार चालवत असल्याचे निष्पन्न झाले होते. पोलिसांनी त्याला कोर्टात हजर केले असता काही तासात त्याला जामीनही मिळाला.
    याप्रकरणी अधिक माहिती अशी की मृत अंकुर खंडेलवाल हे चंदननगर परीसरातील कुमार पिपरा सोसायटीत राहतात. ते पत्नी आणि मुलासह शेजारच्या इमारतीत राहणाऱ्या नातेवाईकांकडे गेले होते. त्यानंतर रात्री साडेबारा वाजण्याच्या सुमारास आपल्या घरी परत जात असताना हा अपघात घडला. खंडेलवाल दाम्पत्य हे फुटपाथवरून जात असतानाही भरधाव वेगात आलेल्या गाडीने त्यांना जोराची धडक दिली. त्यानंतर ही गाडी पुढे जाऊन एका भिंतीला धडकली. ही धडक एवढी जोरात होती की सिमेंटची भिंत जमीनदोस्त झाली.
    अंकुर खंडेलवाल अवघ्या ३८ वर्षवयाचे होते. त्याच्या मागे पत्नी आणि आठ वर्षाचा मुलगा आहे. त्यांच्या मृत्यूने खंडेलवाल कुटुंबियांवर मात्र आभाळ कोसळले आहे. आरोपीला आता कठोरात काठोर शिक्षा करण्यात यावी अशी मागणी खंडेलवाल कुटुंबियांकडून होत आहे. पोलिसांनी या प्रकरणी आरोपीवर सदोष मनुष्यवधाचा गुन्हा दाखल करण्याची प्रक्रिया सुरू केली आहे.