रयत क्रांतीच्या सदाभाऊ खोत यांच्या मुलासह चौघांवर गुन्हा दाखल

रविकिरण माने हे स्वाभिमानी शेतकरी संघटनेचे काम करीत असल्याने त्यांच्यावर सागर खोत आणि रयत क्रांती संघटनेच्या कार्यकर्त्यांचा राग आहे. याच रागातून त्यांनी घरात बसून मारहाण केल्याचा आरोप रविकिरण माने यांनी केला आहे. मारहाणीच्या प्रकारानंतर माने यांनी सोमवारी रात्री उशिरा कासेगाव पोलीस ठाण्यात धाव घेऊन फिर्याद दाखल केली.

    सांगली  : रयत क्रांती संघटनेचे प्रमुख व आमदार सदाभाऊ खोत यांचा मुलगा सागर खोत याने स्वाभिमानी शेतकरी संघटनेच्या कार्यकर्त्याच्या घरात घुसून दहशत माजवत मारहाण केली. स्वाभिमानी शेतकरी संघटनेचे काम करतो, तसेच सदाभाऊ खोत यांच्यावर टीका करीत असल्याच्या रागातून सागर खोत याच्यासह चौघांनी हे कृत्य केल्याबाबत गुन्हा दाखल करण्यात आला आहे. तांबवे (ता. वाळवा) येथे सोमवारी रात्री साडेनऊच्या सुमारास हा प्रकार घडला. याबाबत स्वाभिमानी शेतकरी संघटनेचे कार्यकर्ते रवीकिरण राजाराम माने (वय ३५, रा. तांबवे, ता. वाळवा) यांनी कासेगाव पोलीस ठाण्यात फिर्याद दिली आहे.

    धमकी देत धक्काबुक्की केली
    रवीकिरण माने यांच्या फिर्यादीनुसार सागर सदाभाऊ खोत, अभिजीत भांबुरे, स्वप्नील सूर्यवंशी (तिघेही रा. इस्लामपूर) आणि सत्यजीत कदम (रा. शिराळा) या चौघांविरोधात गुन्हा दाखल करण्यात आला आहे. माने यांनी दिलेल्या माहितीनुसार, सोमवारी रात्री नऊच्या सुमारास आमदार सदाभाऊ खोत यांचा मुलगा सागर खोत हा तीन मित्रांसह तांबवे येथील घरी आला. त्यांच्या हातात तलवार, चाकू, गुप्ती अशी धारदार शस्त्रे होती. घरात येताच त्यांनी, ‘तुला मस्ती आली आहे काय? स्वाभिमानी शेतकरी संघटनेचे काम करतोस आणि सदाभाऊ खोत यांच्यावर टीका करतोस. तुला जिवंत सोडणार नाही,’ अशी धमकी देत त्यांनी धक्काबुक्की केली. यावेळी त्यांनी आई, वडील, भाऊ वृषसेन आणि पत्नी मनोरमा यांनाही धक्काबुक्की केली. आरडाओरडा झाल्याने परिसरातील लोक जमा होतात चौघे निघून गेले.

    शेतकरी संघटनेचे कार्यकर्ते आक्रमक
    रविकिरण माने हे स्वाभिमानी शेतकरी संघटनेचे काम करीत असल्याने त्यांच्यावर सागर खोत आणि रयत क्रांती संघटनेच्या कार्यकर्त्यांचा राग आहे. याच रागातून त्यांनी घरात बसून मारहाण केल्याचा आरोप रविकिरण माने यांनी केला आहे. मारहाणीच्या प्रकारानंतर माने यांनी सोमवारी रात्री उशिरा कासेगाव पोलीस ठाण्यात धाव घेऊन फिर्याद दाखल केली. आमदार पुत्राकडून घरात बसून झालेल्या मारहाणीनंतर स्वाभिमानी शेतकरी संघटनेचे कार्यकर्ते आक्रमक बनले आहेत. सागर खोत याच्यासह चौघांनाही पोलिसांनी तातडीने अटक करावी, अन्यथा रस्त्यावर उतरून आंदोलन करू, असा इशाराही स्वाभिमानी शेतकरी संघटनेच्या कार्यकर्त्यांनी दिला आहे. यामुळे येणाऱ्या काळात सदाभाऊ खोत आणि राजू शेट्टी यांचे कार्यकर्ते एकमेकांच्या विरोधात उभे ठाकले आहेत.