भारतीय सैन्य दलात भरती : पुणे, सोलापूर ,नगरसह ६ जिल्ह्यातील उमेदवारांना संधी ; राहुरी कृषी विद्यापीठात ७ ते २३ सप्टेंबर रोजी होणार भरती प्रक्रिया

गेल्या अनेक वर्षानंतर पुणे सैन्यभरती कार्यालयांतर्गत सैन्य भरती होत असल्याने या क्षेत्रात इच्छुक असणाऱ्या उमेदवारांना मोठी संधी उपलब्ध झाली आहे. या विभागातील सैन्यदल व पोलीस दलासाठी इच्छुक असणाऱ्या उमेदवारांची संख्या मोठी आहे. गेल्या अनेक दिवसांपासून तरुण तरुणी मोठ्या प्रमाणावर यासाठी सराव करत आहेत.

    अमोल तोरणे, बारामती: भारतीय सैन्य दलासाठी भरती प्रक्रिया जाहीर झालेली असून सैन्य दलाच्या पुणे सैन्यभरती कार्यालयांतर्गत अंतर्गत येणाऱ्या पुणे, सोलापूर, अहमदनगर, लातूर, बीड, उस्मानाबाद जिल्ह्यांमध्ये ही भरती प्रक्रिया सुरू झाली आहे. दि ७ सप्टेंबर ते २३ सप्टेंबर दरम्यान अहमदनगर जिल्ह्यातील राहुरी येथील महात्माा फुले कृषी विद्यापीठात ही भरती प्रक्रिया होणार आहे.

    या भरती प्रक्रियेमध्ये इ. ८ वी, १० वी व १२ वी उत्तीर्ण उमेदवारांना मोठी संधी उपलब्ध झाली आहे. ही भरती संपूर्ण महाराष्ट्रासाठी नसून पुणे आर्मी रिक्रुमेंट ऑफीस अंतर्गत येणाऱ्या अहमदनगर, बीड, लातूर, उस्मानाबाद, पुणे आणि सोलापूर या ६ जिल्ह्यांसाठी असणार आहे. यासाठी ऑनलाईन रजिस्ट्रेशन आवश्यक असून ते ९ जुलै ते २२ ऑगस्ट या दरम्यान असणार आहे. ॲडमीट कार्ड दि २४ ऑगस्ट नंतर उपलब्ध होणार आहे. या भरतीमध्ये १० वी उत्तीर्ण उमेदवारांना सोल्जर जनरल ड्युटी, ट्रेड्समॅन या पदांसाठी अर्ज करता येईल. तर ८ वी उत्तीर्ण उमेदवारांना ट्रेड्समॅन मधील मेस किपर, हाऊस किपर यासारख्या पदांकरीता अर्ज करता येईल. याशिवाय १२ वी उत्तीर्ण उमेदवारांना सोल्जर टेक्निकल, सोल्जर नर्सिंग असिस्टंट आदी पदांसाठी अर्ज करता येईल. या भरतीसाठी सुरूवातीला शारीरिक मोजमापे घेतली जातील व त्यानंतर १०० गुणांची शारीरिक क्षमता चाचणी घेतली जाईल. यामध्ये १६०० मीटर धावणे व पुल अप्स हे दोन प्रकार असणार आहेत. याशिवाय ९ फुट रूंद खड्डा पार करणे व निमुळत्या झिगझॅक फळीवरून तोल संभाळत चालणे या प्रकारांचा समावेश असणार आहे. शारीरिक क्षमता चाचणी झाल्यानंतर पात्र उमेदवारांची वैद्यकीय चाचणी घेतली जाईल. या वैद्यकीय चाचणीत दृष्टीदोष, शारीरिक व्यंग इत्यादी तपासण्या केल्या जातील.‍ शारीरिक क्षमता व वैद्यकीय चाचणीत पात्र ठरलेल्या उमेदवारांची वस्तुनिष्ठ बहुपर्यायी स्वरूपाची हिंदी किंवा इंग्रजी भाषेतून लेखी परीक्षा घेतली जाईल. शेवटी मैदानी चाचणी व लेखी परीक्षेच्या माध्यमातून उमेदवारांची अंतिम निवड केली जाणार आहे.

    या भरतीसाठी उमेदवारांकडे ॲडमिट कार्ड, फोटो, शैक्षणिक कागदपत्रे, डोमेसाईल प्रमाणपत्र, जात व धर्म प्रमाणपत्र, चारित्र्य प्रमाणपत्र आदि कागदपत्र असणे आवश्यक आहे. याबाबत बोलताना सह्याद्री करिअर अकॅडमी, बारामती चे संचालक उमेश रूपनवर म्हणाले की, ‘भारतीय सैन्य दलांमध्ये पुणे आर्मी रिक्रुटींग ऑफीस अंतर्गत होणाऱ्या आर्मी भरतीमध्ये पहिल्यांदाच सोलापूर जिल्ह्याचा समावेश केला आहे. या भरतीतील पात्रता, मैदानी परीक्षा, लेखी परीक्षा, बोनस गुण व इतर बाराकावे जाणून घेतल्यास यामध्ये मुलांना सहज भरती होता येईल.

    दरम्यान गेल्या अनेक वर्षानंतर पुणे सैन्यभरती कार्यालयांतर्गत सैन्य भरती होत असल्याने या क्षेत्रात इच्छुक असणाऱ्या उमेदवारांना मोठी संधी उपलब्ध झाली आहे. या विभागातील सैन्यदल व पोलीस दलासाठी इच्छुक असणाऱ्या उमेदवारांची संख्या मोठी आहे. गेल्या अनेक दिवसांपासून तरुण तरुणी मोठ्या प्रमाणावर यासाठी सराव करत आहेत.