चक्क दोरखंड बांधून एटीएम पळवले

पिंपरी: एटीएमला दोरखंड बांधून ओढून काढले आणि ते टेम्पोमध्ये टाकून पळवून नेल्याचा धक्कादायक प्रकार मंगळवारी (९ जून) पहाटे चिंचवडमधील थरमॅक्से चौकात घडला. एटीएम आयसीआयसीआय बँकेचे होते. पोलिसांनी

पिंपरी: एटीएमला दोरखंड बांधून ओढून काढले आणि ते टेम्पोमध्ये टाकून पळवून नेल्याचा धक्कादायक प्रकार मंगळवारी (९ जून) पहाटे चिंचवडमधील थरमॅक्से चौकात घडला. एटीएम आयसीआयसीआय बँकेचे होते.

पोलिसांनी दिलेल्या माहितीनुसार, थरमॅक्से चौक येथील नवमी हॉटेलजवळ आयसीआयसीआय बँकेचे एटीएम आहे. मंगळवारी पहाटे चार ते पाच चोरटे पिकअप व्हॅनमधून आले. त्यांनी एटीएमला दोरखंड बांधला आणि एटीएम सेंटरबाहेर ओढून काढले. एटीएम हलल्यामुळे सेंटरमधील धोक्याची सूचना देणारा सायरन वाजला. सायरन वाजत असतानाही चोरट्यांनी ओढून बाहेर आणलेले एटीएम वाहनात टाकले आणि धूम ठोकली. सायरनचा आवाज ऐकून जवळच असणारा एक सुरक्षा रक्षक सावध झाला. त्याने दुसऱ्या सुरक्षा रक्षकाच्या मदतीने पोलीस नियंत्रण कक्षास याबाबतची माहिती दिली. घटनेची माहिती मिळताच पिंपरी-चिंचवड पोलीस घटनास्थळी पोहोचले. मात्र तोपर्यंत चोरटे पळून गेले होते. पोलीस नियंत्रण कक्षाने आसपासच्या सर्व पोलिसांना याबाबत सूचना दिली. मात्र ही पिकअप व्हॅन कोणाच्याही हाती लागलेली नाही. या एटीएममध्ये ७ जूनला दहा लाखांची रोकड भरण्यात आली होती. त्यापैकी एमटीएममध्ये किती रक्क्म होती, याबाबत निश्चित माहिती मिळू शकली नाही. मात्र, ५ लाख ७१ हजार रुपये शिल्लक असल्याचे सांगितले जात आहे.

पिंपरी-चिंचवडमध्ये अशा पद्धतीने एटीएम चोरून नेणारी आंतरराज्य टोळी सक्रिय आहे. यातील काही लोकांना वाकड पोलिसांनी अटक केली होती. तेव्हा शहरातील ५ गुन्हे उघड झाले होते. परंतु, त्यानंतर पुन्हा हे प्रकार सुरू झाल्याने टोळीतील अन्य सदस्य सक्रिय झाल्याचा पोलिसांना अंदाज आहे.