अजब ! तरुणाचे अपहरण करून खंडणीपोटी मागितली किडनी

-महिलासह दोन पोलीस शिपायांबरोबर सात जणांवर गुन्हा दाखल

पिंपरी : अनैतिक संबंधातुन एका तरुणाचे अपहरण करून खंडणीपोटी १० लाख रुपए किंवा किडनी  देण्याची मागणी करण्यात आल्याची घटना समोर आली आहे. या प्रकरणी पिंपरी चिंचवड़ मधील वाकड़ पोलिसांनी एक महिला पोलिस शिपाई सह दोन पोलिस शिपायांबरोबर सात जणांवर गुन्हा दाखल केला आहे. या महिला पोलिस शिपाईचे अपहरण करण्यात आलेल्या तरुणाबरोबर अनैतिक संबंध असल्याची माहिती ही पुढे आली आहे.

हा प्रकार ५ डिसेंबर रोजी भर दिवसा घडला. या प्रकरणी महिला पोलीस शिपाई मनीषा साळवे, पोलीस शिपाई विजय कुमार साळवे, नंदकुमार कांबळे, आक्की लोंढे, सनी लोंढे, विनय लोंढे, मनीषा साळवेची आई अशी गुन्हा दाखल झालेल्यांची नावे आहेत. सूरज असगर चौधरी (वय २१, रा. ओटास्कीम, निगडी) असे अपहरण, मारहाण झालेल्या तरुणाचे नाव आहे. त्याने याबाबत शुक्रवारी (दि. ११) मध्यरात्री वाकड पोलीस ठाण्यात फिर्याद दिली आहे.

पोलिसांनी दिलेल्या माहितीनुसार, आरोपी महिला पोलीस शिपाई मनीषा साळवे ही पिंपरी वाहतूक शाखेत कार्यरत आहे. तर आरोपी विजय साळवे हा पोलीस मुख्यालय शिवाजीनगर येथे नेमणुकीस आहे. आरोपी मनीषा हिचे आणि फिर्यादी सूरजचे अनैतिक संबंध होते. मनीषा हिने सूरजकडून काही पैसे घेतले होते. ते पैसे देण्यासाठी आरोपीने सूरजला ५ डिसेंबर रोजी थेरगाव येथील रॉयल कोर्ट सोसायटी समोर बोलावून घेतले. सूरज ५ डिसेंबर रोजी सकाळी सव्वादहा वाजता बोलावलेल्या ठिकाणी गेला. त्यानंतर आरोपींनी सूरजला एका गाडीत जबरदस्तीने बसवून इंदापूरजवळ असलेल्या जंगलात नेले.

तिथे आरोपींनी सूरजला लाकडी दांडक्याने, कोयत्याने मारहाण केली. दरम्यान आरोपींनी सूरजचा मोबाईल फोन घेतला. मनीषा हिने सूरजसोबत असलेले फोटो आणि व्हिडिओ नष्ट करण्याच्या उद्देशाने सूरजचा मोबाईल फोन फोडून फेकून दिला. त्यानंतर आरोपींनी सूरजकडे दहा लाख रुपयांची खंडणी मागितली. दहा लाख रुपये दे नाहीतर तुझी किडनी दे, अशी मागणी करीत धमकी दिली. हा प्रकार ५ डिसेंबर रोजी सकाळी सव्वादहा ते दुपारी तीन या कालावधीत घडला. याबाबत आठवडाभरानंतर गुन्हा दाखल करण्यात आला आहे. वाकड पोलीस तपास करीत आहेत.