गुंडाची अंत्ययात्रा रॅली पोलिसांनाही भोवली ; पोलीस अधिकाऱ्यांवर मोठी कारवाई

कोरोना नियमावलीचे उल्लंघन करत पुणे शहरातील बालाजीनगर ते कात्रज स्मशानभूमी या दरम्यान एका खून झालेल्या सराईताच्या अंत्यविधीला तब्बल १०० ते १२५ दुचाकींची रॅली काढण्यात आली. याप्रकरणी १५० ते २०० जणांविरूद्ध सहकारनगर पोलीस ठाण्यात गुन्हा दाखल करण्यात आला आहे. एका गुंडाच्या अत्यंविधीला कोरोनाच्या काळात एवढी गर्दी जमल्यामुळे पोलिसांच्या कार्यक्षमतेवर प्रश्नचिन्ह निर्माण झाले.

    पुणे : सराईत गुन्हेगार माधवा वाघाटेच्या खूनानंतर त्याच्या समर्थकांनी अंत्यविधीला काढलेल्या दुचाकी रॅलीची पोलीस आयुक्त अमिताभ गुप्तांनी गांभिर्याने दखल घेतली. सहकारनगर पोलीस ठाण्याच्या हद्दीतून ही रॅली निघाली होती. त्यामुळे तेथील वरिष्ठ पोलीस निरीक्षकासह गुन्हे निरीक्षकाची देखील बदली करण्यात आली आहे. हा प्रकार घडल्यानंतर पोलिसांवर सर्वस्तरातून टीका झाली होती. त्यामुळे अतिवरिष्ठ अधिकाऱ्यांनी रॅलीत सहभागी झालेल्यांना अटक करण्यासाठी रात्री उशीरापर्यंत परिसरात तळ ठोकला होता.

    वरिष्ठ पोलिस निरीक्षक गौतम गंभीरे यांची आर्थिक व सायबर गुन्हे येथे तर गुन्हे निरीक्षक राजेंद्रकुमार कदम यांची गुन्हे शाखेत बदली करण्यात आली आहे. स्वाती देसाई यांची सहकारनगरच्या वरिष्ठ पोलिस निरीक्षकपदी नियुक्ती करण्यात आली आहे. करोनाच्या संकटात परिसरातून एवढी मोठी रॅली निघते पण पोलिसांनी योग्य वेळी अॅक्शन न घेतल्यामुळे ही कारवाई करण्यात आली आहे.

    कोरोना नियमावलीचे उल्लंघन करत पुणे शहरातील बालाजीनगर ते कात्रज स्मशानभूमी या दरम्यान एका खून झालेल्या सराईताच्या अंत्यविधीला तब्बल १०० ते १२५ दुचाकींची रॅली काढण्यात आली. याप्रकरणी १५० ते २०० जणांविरूद्ध सहकारनगर पोलीस ठाण्यात गुन्हा दाखल करण्यात आला आहे. एका गुंडाच्या अत्यंविधीला कोरोनाच्या काळात एवढी गर्दी जमल्यामुळे पोलिसांच्या कार्यक्षमतेवर प्रश्नचिन्ह निर्माण झाले. याबाबत उपनिरीक्षक हरिश्चंद्र केंजळे यांनी तक्रार दिली आहे. त्यानुसार सिध्दार्थ पलंगे, कुणाल चव्हाण, सुनील खाटपे, अमित खाटपे, सौरभ भगत, राजकुमार परदेशी, ऋषीकेश भगत, गणेश फाळके याच्यासह साथीदारांच्या विरूद्ध गुन्हा दाखल करण्यात आला आहे.