महाबळेश्वर-पांचगणी रस्त्यावर ‘मॅप्रो’चा व्यवसाय जोरात; जिल्हाधिकाऱ्यांच्या आदेशाला हरताळ

    महाबळेश्वर : कोरोनाचा प्रादुर्भाव रोखण्यासाठी सातारा जिल्हाधिकारी यांनी जिल्ह्यात विकेंडला कडक लॉकडाऊन जाहीर करून सर्वत्र संचारबंदीचे आदेश लागू केले आहेत. असे असताना महाबळेश्वर पांचगणी रस्त्यावर मॅप्रो कंपनीने जिल्हाधिकारी यांच्या आदेशाला हरताळ फासून आपला व्यवसाय जोमाने सुरू ठेवला आहे. एकीकडे छोट्या-मोठ्या व्यापाऱ्यांवर दंडात्मक तर कधी सील करण्याची कारवाई करते. मात्र, मॅप्रो कंपनीवर प्रशासन एवढे मेहरबान का? असा सवाल नागरिक करीत आहे.

    कोरोनाबाबत सातारा जिल्हा चौथ्या टप्प्यात आहे. त्यामुळे नियम शिथील होण्यास थोडा वेळ लागत आहे. सध्या आठवड्यातील काही दिवस नियम शिथिल करून विकेंडच्या शनिवारी व रविवारी कडक लॉकडाउन जाहीर करण्यात आला आहे. या काळात संचारबंदी लागू करण्यात आली आहे. मात्र, विकेंडला महाबळेश्वर व पांचगणी येथे पर्यटकांची चांगलीच वर्दळ वाढली आहे. शनिवारी महाबळेश्वर पांचगणी रस्ता, भिलार, भौसे, नंदनवन कॉलणी या ठिकाणी मोठया प्रमाणावर पर्यटक मुक्कामी आले होते. हे सर्व आज रविवारी चेकआउट करून बाहेर पडले आहेत. या पर्यटकांना महाबळेश्वर येथे कडक बंदमुळे काही खरेदी करता आली नाही. मात्र, गुरेघर येथे मॅप्रो कंपनीने आपले व्यवसाय सुरू ठेवल्याने पर्यटकांची पाऊले मॅप्रो कंपनीकडे वळत आहेत.

    आज सकाळपासूनच घराकडे निघालेल्या पर्यटकांनी खरेदीसाठी मॅप्रो कंपनीच्या गेटवर गर्दी केली होती. या ठिकाणी त्यांना रेस्टॉरंटमधील खाद्य पदार्थांबरोबरच जाम, जेली, सिरप, चॉकलेट आदी मिळत आहे. त्यामुळे पर्यटक मोठ्या प्रमाणावर खरेदी करीत आहेत. या ठिकाणी गर्दीमुळे कोणी सोशल डिस्टन्सिंगचा नियम देखील पाळताना दिसत नाही. जिल्ह्यात कडक लॉकडाउन आहे. सर्व आस्थापना बंद आहेत. रेस्टॉरंटमधील पार्सल सेवाही विकेंडमध्ये बंद ठेवण्याचे आदेश आहेत.

    महाबळेश्वर येथील सर्व व्यवसायिक या नियमांचे काटेकोरपणे पालन करीत आहेत. मॅप्रो कंपनी मात्र जिल्हाधिकारी यांच्या आदेशाला हरताळ फासत असताना प्रशासन मॅप्रोकडे डोळेझाक करीत आहे. याबाबत सर्वत्र आश्चर्य व्यक्त केले जात आहे. मॅप्रो कंपनीचे आणि अधिकारी वर्गाचे संबंध घनिष्ठ असल्याचा गैरफायदा मॅप्रो कंपनी घेत असल्याची चर्चा जोर धरू लागली आहे. कोणी कितीही तक्रारी केल्यातरी आमच्या मालकाचे कोणी काही वाकडे करू शकत नाही, अशी शेखी तेथील कामगार करीत आहेत.

    मॅप्रो कंपनीकडून होत असलेल्या नियमभंगाबाबतची माहिती येथील पत्रकारांनी प्रांताधिकारी संगिता राजापूरकर यांना दिली. आता प्रांताधिकारी मॅप्रो कंपनीवर काय कारवाई करणार? याकडे सर्वांचे लक्ष लागून राहिले आहे. तालुक्यात महाबळेश्वर शहर वगळता सर्वत्र लॉज, हॉटेल चालू आहे. पर्यटकांना तेथे प्रवेश दिला जातो. महाबळेश्वर येथे मात्र पर्यटकांना बंदी आहे. या नियमांमुळे महाबळेश्वरकरांवर अन्याय होत आहे. जर नियमांचे पालन करता येत नसेल तर महाबळेश्वर शहरावरील निर्बंध हटवावेत अथवा पर्यटकांना प्रवेश देणारे खाजगी बंगले, लॉज, हॉटेल यांच्यावर दंडात्मक किंवा सील करण्याची कारवाई जिल्हाधिकारी यांनी करावी, अशी मागणी केली जात आहे.