इंधन दरवाढीविरोधात शहर युवक काँग्रेसच्या वतीने स्वाक्षरी मोहीम

    सोलापूर : महाराष्ट्र प्रदेश युवक काँग्रेसतर्फे पेट्रोल, डिझेल व गॅस दरवाढीच्या तसेच महागाईच्या विरोधात महाराष्ट्र प्रदेश काँग्रेस कार्याध्यक्षा आमदार प्रणिती शिंदे, महाराष्ट्र प्रदेश युवक काँग्रेस अध्यक्ष सत्यजित तांबे यांच्या मार्गदर्शनाखाली “एकच लक्ष मोदी सरकार विरुध्द एक कोटी साक्ष” राज्यव्यापी स्वाक्षरी मोहिमेअंतर्गत सोलापूर शहर युवक काँग्रेसच्या वतीने “स्वाक्षरी मोहिमेचा शुभारंभ” आज रोजी नवल पेट्रोल पंप येथे सोलापूर शहर काँग्रेस कार्याध्यक्ष संजय हेमगड्डी, मनोज यलगुलवार यांच्या हस्ते करण्यात आला.

    यावेळी सोलापूर शहर युवक काँग्रेस अध्यक्ष अंबादास बाबा करगुळे, प्रदेश सरचिटणीस नगरसेवक विनोद दादा भोसले, युवक कार्याध्यक्ष युवराज जाधव, उत्तर विधानसभा अध्यक्ष विवेक कन्ना, तिरूपती परकीपंडला, सुभाष वाघमारे, दाऊद नदाफ, प्रतिक अबुटे, विवेक इंगळे ,शाहू सलगर, महेश लोंढे, संजय गायकवाड, अभिषेक गायकवाड, आशितोष वाले, भीमा पेदे, भगवान करगुळे, मोनेश घंटे, धम्मा झगझाप, विनायक भंडारे, भीमा बज्जर, यांच्यासह इतर पदाधिकारी उपस्थित होते.

    यावेळी शहर काँग्रेस कार्याध्यक्ष संजय हेमगड्डी म्हणाले की, केंद्रातील मोदी सरकार देशातील महागाई वाढण्यास कारणीभूत आहे. पेट्रोल-डिझेलबरोबरच अन्य जीवनावश्यक वस्तूंच्या वाढत्या किंमतींमुळे जनतेचे जीवन असहाय्य झाले आहे. याविरोधात महाराष्ट्र युवक काँग्रेसने स्वाक्षरी मोहीम आयोजित केली आहे.

    त्या अंतर्गत सोलापूर शहर युवक काँग्रेसच्या वतीने दोन लाख सह्या गोळा करण्यात येऊन प्रदेश युवक काँग्रेसच्या ‘एकच लक्ष मोदी सरकार विरुद्ध एक कोटी साक्ष’ अंतर्गत राष्ट्रपती रामनाथ कोविंद आणि पंतप्रधान नरेंद्र मोदी यांना देण्यात येऊन पेट्रोल, डिझेल, गॅस सिलेंडरच्या दरवाढीविरुद्ध जनतेचा आक्रोश त्यांच्यापर्यंत पोहचविण्यात येणार असून, ताबडतोब दरवाढ कमी करावी अशी मागणी करण्यात येणार आहे.