समाधान अवताडे भाजपात जाणार? परिचारकांनीच दिली फडणवीसांकडे संमती?

मुंबईत विरोधी पक्षनेते देवेंद्र फडणवीस यांच्या उपस्थितीत बैठकीत आमदार परिचारक यांनीच अवताडे यांच्या नावाला संमती दिल्याचे समजते. त्यामुळे भाजपकडून दामाजी कारखान्याचे अध्यक्ष समाधान अवताडे यांच्या उमेदवारीवर शिक्कामोर्तब जवळपास झाले आहे. याबाबतची अधिकृत घोषणा होणे बाकी राहिले आहे.

    मंगळवेढा : आमदार भारत भालके यांच्या अकाली निधनानंतर होणाऱ्या पंढरपूर – मंगळवेढा विधानसभा पोटनिवडणुकीसाठी सध्या अपक्ष उमेदवार अर्ज दाखल करत असले, तरी अधिकृत पक्षांची उमेदवारी जाहीर झाली नाही. दरम्यान, भाजपचे उमेदवार म्हणून समाधान अवताडे निश्‍चित होण्याच्या मार्गावर आहेत.

    अधिकृत घोषणा होणे बाकी 

    सुधाकरपंत परिचारक यांच्या निधनामुळे परिचारक गट कोणत्याही सार्वजनिक कार्यात सहभागी झाला नाही. परंतु त्यांनी निवडणुकीला सामोरे जाण्याऐवजी यंदा पक्षाच्या उमेदवाराला निवडून आणण्यासाठी सहकार्य करण्याची भूमिका घेतली.गत निवडणुकीत दिवंगत भारत भालके यांच्या बरोबरीने सुधाकरपंत परिचारक व दामाजी कारखान्याचे अध्यक्ष समाधान अवताडे हे तिघे होते. परंतु भाजपने ही जागा जिंकण्याचा इरादा स्पष्ट केल्यामुळे आमदार प्रशांत परिचारक व दामाजी कारखान्याचे अध्यक्ष समाधान अवताडे यांच्यात कोण कमळ धरणार? याची चर्चा असतानाच मुंबईत विरोधी पक्षनेते देवेंद्र फडणवीस यांच्या उपस्थितीत बैठकीत आमदार परिचारक यांनीच अवताडे यांच्या नावाला संमती दिल्याचे समजते. त्यामुळे भाजपकडून दामाजी कारखान्याचे अध्यक्ष समाधान अवताडे यांच्या उमेदवारीवर शिक्कामोर्तब जवळपास झाले आहे. याबाबतची अधिकृत घोषणा होणे बाकी राहिले आहे.

    राष्ट्रवादीचा उमेदवार हा तुमच्या मनातला : अजित पवार
    पोटनिवडणुकीसाठी राष्ट्रवादीकडून भालके कुटुंबाबरोबरच उपमुख्यमंत्री अजित पवार यांचे पुत्र पार्थ पवार यांचे नाव प्राथमिक स्वरूपात चर्चेत आले होते. परंतु राष्ट्रवादीच्या पक्ष निरीक्षकांकडे कार्यकर्त्यांनी भगीरथ भालके यांना उमेदवारीची मागणी केली. तर उपमुख्यमंत्री अजित पवार यांनी पंढरपूर दौऱ्यात, राष्ट्रवादीचा उमेदवार हा तुमच्या मनातील असणार असल्याचे सांगितले.मात्र भगीरथ भालके की जयश्री भालके यांच्या नावांची घोषणाही अद्याप झालेली नाही. पण कार्यकर्त्यांची मागणी भगीरथ भालके यांना आहे.