राष्ट्रकुल क्रीडा स्पर्धेतून खेळाडू बेपत्ता! क्रीडा विश्वात उडाली खळबळ

    इंग्लंडच्या बर्मिंगहम येथे आयोजित करण्यात आलेली राष्ट्रकुल क्रीडा स्पर्धा (Commonwealth Games 2022) ८ ऑगस्ट रोजी संपन्न झाली. या स्पर्धेत सर्वच देशातील खेळाडूंनी चांगली कामगिरी केली असून काही जण पदक जिंकण्यात यशस्वी झाले आहेत. भारतासाठी देखील ही स्पर्धा खास ठरली असून या स्पर्धेत ६१ पदक भारतीय खेळाडूंनी कमावली. जगभरात या स्पर्धेचा बोलबाला सुरु असतानाच, आता या स्पर्धेतून एक धक्कादायक बातमी समोर आलेली आहे. राष्ट्रकुल क्रीडा स्पर्धेच्या २२ व्या हंगामातून काही देशातील खेळाडू बेपत्ता झाले असून या बातमीने सध्या क्रीडा विश्वात मोठी खळबळ उडाली आहे.

    ८ ऑगस्ट रोजी राष्ट्रकुल क्रीडा स्पर्धेचा समारोह सोहोळा पार पडला. यात पाकिस्तानचे दोन बॉक्सर सुलेमान बलूच (Suleman Baloch) आणि नजीरुल्लाह खान (Nazeer Ullah Khan) हे दोन खेळाडू स्पर्धेच्या समारोह सोहोळ्यात सहभागी होण्यासाठी गेले असताना तेथून ते बेपत्ता झाल्याची माहिती समोर आली आहे. राष्ट्रीय महासंघानं ही माहिती दिली असून पाकिस्तान बॉक्सिंग फेडरेशनचे सचिव नासेर तांग यांनी देखील या वृत्ताला दुजोरा दिला आहे. पाकिस्तानच्या पूर्वी श्रीलंकेतील काही खेळाडू देखील या स्पर्धेतून बेपत्ता झाल्याची माहिती समोर आली होती. पाकिस्तान ऑलिम्पिक संघानं बेपत्ता झालेल्या दोन बॉक्सरचा तपास करण्यासाठी चार सदस्यीय समितीची स्थापना केलीय. याआधी दोन महिन्यापूर्वी राष्ट्रीय जलतरणपटू फैझान अकबर हंगेरीतील फिनावर्ल्ड चॅम्पियनशिपमधून बेपत्ता झाला होता. मात्र जूनपासून त्याचा तपास लागला नाही.

    पाकिस्तान बॉक्सिंग फेडरेशनचे सचिव नासेर तांग म्हणाले…..
    “सुलेमान बलूच आणि नजीरुल्लाह खान यांचे पासपोर्ट आणि इतर प्रवासाची कागदपत्रे महासंघाच्या अधिकाऱ्यांकडे आहेत. संघ व्यवस्थापनानं यूकेमधील पाकिस्तान उच्चायुक्तांना आणि लंडनमधील संबंधित अधिकाऱ्यांना सुलेमान आणि नझिरुल्ला बेपत्ता झाल्याची माहिती दिली. बेपत्ता झालेल्या बॉक्सरची कागदपत्रे पाकिस्तानातून येणाऱ्या सर्व खेळाडूंसाठी मानक कार्यप्रणालीनुसार ठेवण्यात आली”, अशी माहिती तांग यांनी दिली.