पहिल्या कसोटीतील पराभव टीम इंडियासाठी लाजिरवाणा, आकाश चोप्राने केले प्रश्न उपस्थित

पहिल्या कसोटीत केएल राहुलच्या शानदार शतकामुळे टीम इंडियाने पहिल्या डावात 245 धावा केल्या होत्या. पण शार्दुल ठाकूर आणि प्रसिद्ध कृष्णाच्या खराब गोलंदाजीने ते उद्ध्वस्त केले.

    भारत विरुद्ध दक्षिण आफ्रिका : दक्षिण आफ्रिकेविरुद्धच्या पहिल्या कसोटीतील पराभवानंतर टीम इंडिया लक्ष्यावर आहे. माजी क्रिकेटपटू आणि तज्ज्ञ आकाश चोप्रानेही पहिल्या कसोटीतील टीम इंडियाच्या कामगिरीवर प्रश्न उपस्थित केले आहेत. आकाश चोप्राचे मत आहे की, भारताने जसा खेळ करणे आवश्यक होते तसे खेळले नाही. आकाशने सांगितले की, खेळपट्टीने दिलेल्या मदतीचा फायदा घेण्यात भारतीय गोलंदाजही अपयशी ठरले.

    पहिल्या कसोटीत केएल राहुलच्या शानदार शतकामुळे टीम इंडियाने पहिल्या डावात 245 धावा केल्या होत्या. पण शार्दुल ठाकूर आणि प्रसिद्ध कृष्णाच्या खराब गोलंदाजीने ते उद्ध्वस्त केले. या दोघांनी 39 षटकात 194 धावा दिल्या आणि केवळ दोन विकेट घेण्यात यश आले. यामुळे आफ्रिकेने 408 धावांची मोठी धावसंख्या उभारली आणि पहिल्या डावात 163 धावांची आघाडी घेतली. भारताने दुसऱ्या डावात केवळ 131 धावा केल्या आणि एक डाव आणि 32 धावांनी सामना गमावला.

    आकाश चोप्रा म्हणाला, तिसऱ्या दिवशी भारताकडून सामन्यात पुनरागमन अपेक्षित होते. तसे झाले नाही. डावाने झालेला पराभव अतिशय लाजिरवाणा आहे. पहिल्या डावात केएल राहुलने चांगली फलंदाजी केली आणि दुसऱ्या डावात विराट कोहली झुंजताना दिसला. याशिवाय एकाही फलंदाजाने क्रीजवर उभे राहण्याचे धाडस दाखवले नाही.

    मालिकेत बरोबरीची संधी
    आकाश चोप्रा पुढे म्हणाला, अश्विन निष्प्रभ होता. शार्दुल आणि प्रसिध यांनी पहिल्या कसोटीत अत्यंत खराब कामगिरी केली. विश्वचषकानंतर शार्दुलने एकही सामना खेळला नव्हता. भारताचे गोलंदाजी आक्रमण अतिशय सामान्य होते. याचा परिणाम टीम इंडियाला पराभवाचा सामना करावा लागला. सध्या टीम इंडिया दोन सामन्यांच्या मालिकेत 0-1 ने पिछाडीवर आहे. भारताला मालिकेत बरोबरी साधण्याची संधी आहे. उभय संघांमधील दुसरा कसोटी सामना ३ जानेवारीपासून खेळवला जाणार आहे.