स्टार खेळाडू रॉजर फेडररचा टेनिसला अलविदा

    स्वित्झर्लंडचा टेनिस स्टार रॉजर फेडरर (Roger Federer) याने शुक्रवारी रात्री त्याच्या कारकिर्दीतील अखेरचा सामना खेळला. लेव्हर कप २०२२ या स्पर्धेनंतर टेनिसमधून निवृत्ती घेणार असल्याची घोषणा रॉजर फेडररने काही दिवसांपूर्वीच केली होती. दरम्यान, शुक्रवारी फेडररला लेव्हर कपच्या दुहेरी सामन्यात जोडीदार राफेल नदालने (Rafael Nadal) साथ दिली. मात्र फेडरर त्याच्या कारकिर्दीतील अखेरचा सामना जिंकू शकला नाही. या सामन्यानंतर सर्व खेळाडूंनी फेडररला त्याच्या पुढील वाटचालीसाठी शुभेच्छा दिल्या. मात्र त्यावेळी फेडररसह कोर्टवर असलेला प्रत्येक खेळाडू भावूक झाल्याचं पाहायला मिळालं.

    ४१ वर्षीय फेडरर दिर्घकाळापासून दुखापतीशी झुंज देत आज. त्याने त्याची शेवटची स्पर्धा विम्बल्डन २०२१ मध्ये खेळली होती. फेडररने त्याच्या कारकिर्दीत एकूण २० ग्रँडस्लॅम विजेतेपदे जिंकली आहेत आणि राफेल नदाल आणि नोव्हाक जोकोविच यांच्यानंतर सर्वाधिक ग्रँडस्लॅम विजेत्यांच्या यादीत तो तिसरा आहे. नदालच्या नावावर २२ तर जोकोविचच्या नावावर २१ विजेतेपद आहेत. रॉजरनं २०१८ मध्ये ऑस्ट्रेलिया ओपनमध्ये शेवटचे ग्रँडस्लॅम जिंकले होते.

    निवृत्तीपूर्वी रॉजर फेडररची भावनिक पोस्ट :
    निवृत्तीपूर्वी रॉजर फेडररनं एक इमोशनल पोस्ट केली होती. ज्यात आपल्या निवृत्तीला दुखापती, फिटनेस आणि वयाचं कारण देत रॉजर फेडरर म्हणाला की, “मी ४१ वर्षांचा आहे. मी २४ वर्षात १५०० हून अधिक सामने खेळले आहेत. टेनिसने मला खूप प्रेम आणि आदर दिला. पण आता माझी स्पर्धात्मक कारकीर्द संपवण्याची वेळ आलीय. लंडनमध्ये पुढील आठवड्यात लेव्हर कप ही माझी शेवटची एटीपी स्पर्धा असेल. मी निःसंशयपणे भविष्यात आणखी टेनिस खेळेन पण ते ग्रँडस्लॅम किंवा टूरवर नाही.”