IPL प्लेऑफसाठी 4 संघांमध्ये रस्सीखेच; गुजरात टायटन्स बिघडवू शकते CSK चा खेळ; आज पडणार तिसरा संघ स्पर्धेतून बाहेर

    नवी दिल्ली : रॉयल चॅलेंजर्स बंगळुरूने शानदार पुनरागमन करीत आयपीएल प्लेऑफचे समीकरण गुंतागुंतीचे केले आहे. विराट कोहलीच्या संघाने सलग 4 विजय मिळवून केवळ आपल्या आशा जिवंत ठेवल्या नाहीत तर चेन्नई सुपर किंग्ज, दिल्ली कॅपिटल्स, लखनऊ सुपरजायंट्सचा खेळही खराब केला आहे. आठवडाभरापूर्वी, चेन्नई (CSK) आणि लखनऊ (LSG) प्लेऑफमध्ये पोहोचतील हे निश्चित दिसत होते. परंतु, आता ते ‘करो आणि मरो’च्या सामन्यात अडकले आहेत. विशेषत: गुजरात टायटन्सने आज शुक्रवारी चेन्नई सुपर किंग्जला हरवले तर एमएस धोनीचा संघ अडचणीत येऊ शकतो. जाणून घ्या IPL प्लेऑफचे समीकरण………

    प्रत्येक सामना प्लेऑफच्या शर्यतीत महत्त्वाचा

    आता IPL 2024 मधील प्रत्येक सामना प्लेऑफच्या शर्यतीत महत्त्वाचा बनला आहे. बुधवारी सनरायझर्स हैदराबादने लखनऊ सुपरजायंट्सचा पराभव केला आणि मुंबई इंडियन्स संघातून बाहेर पडला. गुरुवारी रॉयल चॅलेंजर्स बंगळुरूने पंजाब किंग्जचा पराभव करून त्यांना प्लेऑफमधून बाहेर काढले. आता शुक्रवारी चेन्नई सुपर किंग्ज आणि गुजरात टायटन्स यांच्यात सामना होणार आहे. चेन्नई सुपर किंग्ज जिंकल्यास त्यांचे 14 गुण होतील आणि त्यांचा प्लेऑफ खेळण्याचा मार्ग मोकळा होईल. पण गुजरात टायटन्सने चेन्नईचा पराभव केल्यास प्लेऑफचे समीकरण गुंतागुंतीचे होईल. गुजरात टायटन्सचा पराभव झाल्यास त्यांचे प्लेऑफचे स्वप्न येथेच भंगणार आहे.

    चेन्नई सुपर किंग्जचे तीन सामने बाकी

    चेन्नई सुपर किंग्जचे तीन सामने बाकी आहेत. त्याचे सध्या 12 गुण आहेत. गुजरातला हरवून प्लेऑफच्या शर्यतीत मजबूत राहू शकते. मात्र तो हरला तर उर्वरित दोन सामने खूप महत्त्वाचे ठरतील. चेन्नईचे पुढील दोन सामने राजस्थान रॉयल्स (RR) आणि रॉयल चॅलेंजर्स बंगलोर (RCB) विरुद्ध आहेत. RR आणि RCB हे दोन्ही संघ सध्या उत्कृष्ट फॉर्ममध्ये आहेत. अशा स्थितीत, या संघांना पराभूत करूनच प्लेऑफचा मार्ग निश्चित व्हावा असे सीएसकेला वाटत नाही. रुतुराज गायकवाडच्या नेतृत्वाखाली खेळणाऱ्या सीएसकेला गुजरातचा पराभव करून 14 गुण मिळवायचे आहेत जेणेकरून पुढील मार्ग सुकर होईल.

    आयपीएल प्लेऑफचे संपूर्ण समीकरण समजून घेण्यापूर्वी, पॉइंट टेबलमधील 10 संघांचे स्थान जाणून घेऊ. कोलकाता नाईट रायडर्स (16), राजस्थान रॉयल्स (16) आणि सनरायझर्स हैदराबाद (14) गुणतालिकेत पहिल्या तीन स्थानांवर आहेत. यानंतर चेन्नई सुपर किंग्ज (12), दिल्ली कॅपिटल्स (12) आणि लखनऊ सुपरजायंट्स (12) अनुक्रमे चौथ्या, पाचव्या आणि सहाव्या स्थानावर आहेत. रॉयल चॅलेंजर्स बंगळुरू 10 गुणांसह सातव्या स्थानावर आहे. एक प्रकारे, चौथ्या ते सातव्या क्रमांकावर असलेल्या संघांमध्ये म्हणजे चेन्नई, दिल्ली, लखनौ आणि बेंगळुरू या संघांमध्ये प्लेऑफचा चौथा संघ होण्यासाठी संघर्ष सुरू आहे.